Васолаште медпунктым шукертак вученыт

Калтаса район Васола ял cовет жапыште чот уэмын да тӱзланен гын, индешлымше ийла деч вара тушто шке чоҥымо пӧртла деч моло вашталтыш лийын огыл. Ял озанлык, клуб, кевыт, медпункт пытен толыныт. Тӱҥалтыш школат кужу ӱмыран лийын огыл.

Пытартыш ийлаште Васола койын вашталтеш, калыкшат вестӱрлемеш. «Ушнымаште - вий» калыкмутым ял калык сайын умыла. Эн ондак шӱгарла йыр печым печышт, вара Канди памашым тӱзатышт (Ялыште памашшинча шуко, но калык кумытшо гыч веле вӱдым нумалеш.), шке кӱшеш, «кӱшыч» полшымо денат ял урем-влакым тӧрлышт. Шокшо кеҥеж кечын Элай курыкын эн кӱкшӧ верешыже кермыч, цемент да ошма дене «Василово» манын возен шындышт. Мӱндырк волгалт шинчымыжлан тудым южиктыже Америкысе Голливуд гай коеш манын шаяра. Васолаш толын пурымо годым Калмия эҥер гоч вончыман. Кӱварже пеш тоштемын ыле. Ынде тудымат весым ыштыме, но мучашлыме огыл. Калык йӧратыме «Кандыражым» садикте у кӱвареш пунаш тӱҥалеш манын ӱшанем.

29 августышто васола-влак икте-весе дене у куаным пайлышт - кӱчык жапыште фундамент гыч нӧлтымӧ мобильный медпунктым почыч. У зданийым паша корныш шогалташ ял калык да пагалыме уна-влак погынышт. Тиде Нефтекамск оласе рӱдӧ больницын тӱҥ врачше, район-влак кокласе рӱдерым вуйлатыше

А.З. Кузнецова, Калтаса район администраций вуйлатыше Ю.М. Садыров, Калтаса райсовет депутат П.Т. Петров, районысо физический культура, спорт да туризм шотышто комитет вуйлатыше, медпункт верч чот тургыжланыше В.И. Кугубаев,

Калтаса рӱдӧ больницын тӱҥ врачше Р.В. Зарипов, Калмиямучаш ялсовет вуйлатыше В.В. Маязов толыныт ыле. Вӱдышын сомылжым Е. Крлабаева устан шуктыш. Пайремым верысе мурышо-куштышо самодеятельный коллектив да районысо тӱвыра пӧртын пашаеҥже-влак сӧрастарышт.

Погынышо калыкым ялын историйже, медпунктышто ончыч тыршыше пашаеҥ-влак дене палдарымеке, илалше-влак тений Бирск оласе мед-училищым тунем лекше да тышке пашам ышташ толшо С.В. Михайловалан «Рвезе-влак, тудым вес верыш ида колто, шкаланнак кодыза» мыскара сугыньым пуышт. Ялыште фельдшер эре кӱлеш, но тудым кажне гана вашталтымаш ялысе калыклан гына огыл, районысо тӱҥ врачланат нелылыкым ышта. Светлана Михайлова мемнан дене кужу жаплан кодеш манын ӱшанена.

Вячеслав Имасевичын ойжымат вуйышто кучаш тӱҥалына. Медпункт деч вара калык ынде у клубым вучаш тӱҥале. Калык шкеже эре полшаш ямде. Тыгай пайремым ямдылен кертын гын, ончыкыланат вийже ситышаш.

Е. ТИМИРЬЯНОВА.