Клубышто йокрокланыше уке

Клубна ял покшелне верланен. Тушко калык пайрем да концерт годым погына. У ийлан кожым сӧрастарат. Кастене концертым ончат, вара тӱрлӧ модмашыш ушнат. Йоча-влак ончен гына шинчат - нунын пайремышт школышто эрта. Концертым марла вӱдат. Ял калыкым марла мурымаш-куштымаш дене куандарат. Еҥ-влак марла мурым шулен колыштыт, кидым пералташат огыт ӧркане. Мероприятий деч вара Геннадий Азинбаевын музикан семже почеш чылан, такмаклен, «кандырам» пунен куштат.

Моло пайрем-влакат тыгак эртат. Южгунам кок команде дене ӱчашен налыт. Тунамже пеш шокшо лийын кая. Сеҥышыланат, сеҥалтшыланат пӧлекым кучыктат. Пайремым эртараш ялыште илыше спонсор-влак Л.М. Абсаликова, И.П. Никифорова, С.А. Зверев полшен шогат.

Март тылзыште клубыштына смотр-фестиваль лие. Ял калык, туныктышо да кандашымше-индешымше классыште тунемше-шамыч, погынен, изирак концертым да Оварчык пайремым ончыктышт. Концертыште туныктышо Екатерина Бикмасова «Лек уремыш, таҥем» мурым йоҥгалтарыш. Тунемше-влак кок марла куштымашым куштышт.

Оварчык пайрем моткоч веселан эртыш. Школ музейыште аралалтше вургем чылаштлан ситыш. Ӱдырамаш-влак поякан тувыр ден шовырым чийышт. Кӧлан йыдал ыш сите, меж носки ден калошлан реза лийыч. Клуб вуйлатышылан тӱрлыман вынер тувыр лачеш тольо. Пӧлемым тӱрлыман солык, шондык ӱмбалан курык гай оралыме кӱпчык-влак дене сӧрастарышт. Мотор коҥга йыр Елена Ямаева шогылто. Шешкыж дене оварчыклан киш шӧрым ямдылышт, тушко муным пыштен пудыратышт, коҥгаш шындышт. Тиде жапыште пошкудышт ден шочшышт погынен тольыч. Коҥга гыч оварчыкым луктын, жюри ден уна-влакым сийлышт. Марий вургеман уна-влак ӱстембалсе мелнам, перемечым, оварчыкым авызлышт да шуко поро мутым ойлышт, ӱйышкӧ ший оксам пыштышт. Муралтен шинчымышт ӧрдыж гыч моткоч моторын койо, мурыштат вӱд гай йогыш.

Ӱткӱстӧ ялыште кызытат Оварчык пайремым эртарат. Тудо вашке гына огеш мондалт, шонем. Мемнан дене киш шӧр гыч ыштыме кочышым «оварчык» маныт - векат, оварен кӱмыжлан. А моло вере «тувыртыш» манмым колынам.

Калыкланат, жюриланат пайремна келшыш. Жюри ончыкташ пыштыме марий вургемым да ӱзгар-влакым: тӱрлыман ӱдырамаш тувырым, шымакшым, вынер йолашым, пота ӱштым, шке тӱрлымӧ шовычым, вынерым, ожнысо утюгым да молым - пеш тӱткын шымлыш.

Ял клубым вуйлатышына Вадим Пайметович Янибеков тӱрлӧ пайремым эртараш тырша. Шке пашаштыже школышто ыштыше да тунемше-влаклан эҥерта.

Д. АПЛЕКАЕВА.