Чыла сомылым рӱж шуктат

Шукерте огыл У Пураялыште пеш кугу субботникым эртарен колтышна. Шӱгарлам эрыкташ 100 наре еҥ чумыргыш. Игече сай, кечан ыле, пашаш мияш кумылым нӧлтен шоген. Кӧ мом намиен, шорвондым, шаньыкым, бензопилам ма, чылажат кӱлеш лие. Калык кум шагат наре рӱж тыршыш, а субботник деч вара погынымашым эртарышна. Тушко ялсовет вуйлатыше Р.А. Сайфутдиаровым ӱжынна. Каҥашышаш йодыш ятыр погынен: ушкал кӱтӱм лукташ пагыт шуэш, пожар лӱдыкшыдымылык нерген кутырыман, тений яллан 95 ий да школлан 120 ий теммым палемдыман. Тыге воштыл-ойласен, кугу кумыл дене паша иземмым шижынат ышна шукто. Ялсовет вуйлык Р.А. Сайфутдиаров да Ветеран советым вуйлатыше

О.К. Байдуганов кугу таум каласышт да шушаш арнян Атаум (Сабантуй эртарыме вер) да юмыланпуымашым эрыкташ ойым ыштышт.

Кугу Ачамланде сар пытымылан 73 ий темме лӱмеш велопробегыш тарванышна (снимкыште). Кече мардежан ыле гынат, чыла кумылан еҥ корныш лектын. Эн кугу участникше 60 ийым эрталтыше Светлана Байдимирова ыле. Тудо активный ӱдырамаш - ансамбльыште мура, ик концертнат туддеч посна ок эрте. Тек ончыкыжат тыгаяк чулым, пеҥгыде тазалыкан лиеш, велосипед дене писын кудалыштеш.

Маршрутна тыгай лие - тӱвыра пӧрт деч тӱҥалын, У да Тошто Пураял, Керемет ял уремла дене эртышна. Обелиск воктек пурен лекна, мемориальный оҥа воктен шып шоген, сареш вуйым пыштыше-влакым шарналтышна. Йоча-влаклан велопробег келшен, умбакыжат кайынешт ыле, но мардежанлан кӧра тиддене серлагаш вереште.

8 майыште Сеҥымаш кече лӱмеш митингым эртарышна, обелиск воктек пеледыш аршашым пыштышна да изирак концертым ончыктышна.

Л. ШАМШУКОВА.