Ӱярня йор-йор, мелна чыж-чож

Активист-влак Валерий Марков, Александр Гаврилов, Александр Трофимов, Павел Иштуганов, Евгений Кондратьев верым, ӱстелым, пьедесталым, пум, чучылым ямдылкалышт. В. Марков, ныл шагат эрдене кынелын, узоран капкам, курыкым ыштен, буква-влакым пӱчкеден, «Старт» да «Финиш» мут-влакым возен ямдылен, ече дене таҥасаш «Буранже» дене корным тошкен. А мелна деч посна могай Ӱярня? Валентина пелашыже кастене мелна руашым лугалтен. Эрлашыжым Ӱярня эртарыме верыштак Марина Уварова дене коктын кӱэштыч. Уна-влакат мелнам, перемечым, тӱрлӧ кӧрган когыльым кондышт. Пайрем деч ончыч

В. Марков, кок шагат йӱдым кынелын, Ӱярнялан ойырымо верым уэш ончал савырнен, чыла ямде але иктаж-мом мондымо манын, эше ик гана терген. Теве тыгай пеш ответственный еҥ Пермесолаште шочын-кушкын да ешыж дене ила.

Кажне еҥым изи гынат пӧлек куандара. Тиде гана окса дене Валерий Марков, Евгений Кондратьев, Вероника Михайлова, Руслан Костин, Светлана Иванова, Борис да Вячеслав Александровмыт, Йывангасола культура пӧрт полшышт. Ече дене таҥасыше йоча-шамычлан медаль пӧлекым С. Зайнитдинов ыштыш.

Спорт таҥасымашым туныктышо Денис Сапаев эртарыш. Йывангасола культура пӧрт пашаеҥ-влак Л.В. Алынбекова да Х.М. Шакирьянова, сценарийым ямдылен, Ӱярням вӱдышт. Ялсовет вуйлатыше К.К. Зайнакаева калыкым Ӱярня дене, а пӧрьеҥ-шамычым Ачамландым аралышын кечыж дене шокшын саламлыш, В. Марковлан Ӱярням организоватлаш полшымыжлан калык лӱм дене таум каласыш.

Театрализованный представлений коклаште модыш-влакым, эстафетым эртарышна. Алексей Иванов оҥгыр йӱк дене тавалтен шогышо, тӱрлӧ тасма да пеледыш дене сӧрастарыме имньыж дене кажнын чоныш пайрем шӱлышым пуртыш. Мотор марий вургеман ӱдырамаш-влак, терыш шинчын, лыжга марий мурым йоҥгалтарен, ялым йыр савырнышт.

Ачамландым аралышын кечыже лӱмеш «Супердедушка» ече таҥасымашым да моло конкурслам тарватышна. Тушто Александр Камилянов, Дмитрий Кондратьев, Валерий Марков, Георгий Митрофанов, Валерий Акбулатов, Александр Алынбеков таҥасышт. Нунылан да тугак мешак чиен куржшо, эстафетыште модшо, курык гыч эн мӱндыркӧ мунчалтен кайыше-влаклан пӧлекым ямдыленна ыле. Йоча жапыштым шарналтен, илалшырак-влак К. Зайнакаева, Л. Валишина, А. Костина, Р. Аптиева, Н. Шакирьянова, Л. Костина, Н. Ильчигулова, В. Тимиршина да молат курык гыч куанен мунчалтышт.

Ӱярняна весела лие. Ӱстел тич кочыш, шокшо чай чылалан ситышт. «Кандырам» пунен, мурым мурен, Ӱярням ужатен колтышна.

Л. АЛЫНБЕКОВА, Йывангасола тӱвыра пӧртын вуйлатышыже.