Нерге ӱмбалне нӧлталтын «Ӱжара»

«Ӱжара» - шкешотан ансамбль. Эн ончычак, очыни, шочмо историй-жым палемдыман. «1987-ше ийыште Нерге кыдалаш школлан у полатым чоҥен шогалтымеке, кугу кумыл дене пашам ышташ тӱҥална. Ик кечын, пырля шинчын, муралтен колтышна. Тунам школышто Л.В. Салишев музыкым туныкта ыле. Тыге тӱҥ шотышто туныктышо-влакым ушышо у ансамбль шочо. Идалык гыч Бирскыште эртыше фестивальыш колтышт.

«Кеҥеж эрдене пашаш» муро дене икымше степенян лауреат лийын толна», - шарналтышт ансамбльын пайремым вӱдышӧ участникше-влак.

Ансамбльым 20 ий Л.Н. Шуматбаева вуйлатен, ынде ты сомыл Т.Я. Байгазован вачӱмбак возын. Школ помышеш иланыше, тудын «чурийышкыже» савырныше коллектив кызыт С.А. Каншаеван вуйлатыме Нерге тӱвыра пӧрт пелен пашам ышта.

Кече почеш кече, арня, идалык пуйто шижде эртеныт, а «Ӱжаран» ешыже тугаяк пеҥгыде, негызым пыштыше икмыняр еҥже тачат мураш коштеш. Ийготышт погынен гынат, шӱм-чонышт тугаяк самырык кодын. «Ансамбльым ыштыме годым кӧ 30 ияш лийын, кызыт 60 ияш улеш, 35 ияш лийшыже 65 ийыш тошкалын. Чылажат вийвал пагытыште ышталтын. Ансамбль дене пырля республикын марий-влак илыме тӱрлӧ районыштыжо лийынна, шуко у йолташым муынна. Башкортостан да Марий Эл республикылан президентыштым, Финляндий, Германий, Голландий да моло верла гыч толшо уна-влакым вашлийынна…» - каласкалыш Нерге школын ончычсо директоржо Г.И. Изибаев. Айдеме ӱмырым аклен ончалаш гын, тынар ий коклаште мо гына ок лиеде. Лу еҥым ушышо ансамбльын корныжат тӱрлӧ событий, выступлений, вашлиймаш, шарнымаш, куан да тургыжланымаш дене «тӱрлалтын». «Ӱжаран» мурызыжо-влак Нефтекамскыште «Мурпеледыш», кугурак ийготан-влаклан «Илыш, мый тыйым йӧратем!» фестивальлаш коштмыштым, районысо кажне гаяк мероприятийыш ушнымыштым, хор да вокальный ансамбль-влакын «Звезды Белоречья» кундем-влак кокласе VII фестивальыштышт икымше степенян лауреат лийын пӧртылмыштым да шуко молым эреак шарнаш тӱҥалыт. Шкаланышт теве веле икымше гана мураш чумыргымыштла чучеш гынат, 30 ий шеҥгелан кодын. Но чонышт тунамсылак чӱчкен йӱла, ынде ятыр ий калыкым марийын мурпоянлыкше, койыш-шоктышыжо да вургемже дене палдарат, самырык тукымын шӱм-чонышкыжо шке калыкым йӧратыме кумылым шыҥдарат. Ӧрдыж гыч полышым, оксам вучен шинчыде, шкеак у вургемым тӱрлаш-ургаш, выступатлаш миен толаш, пайремым эртараш, эртыме корнышт нерген фотостендым ышташ, калык муро-влакым погаш да книгам лукташ, «Чолманыш» возен шогаш да молылан жапым муыт.

Коллективым районышто пагалат, садлан саламлаш кумыланжат ятыр ыле. Мишкан район администраций вуйлатышын алмаштышыже Л.Г. Александрова, РДК вуйлатышын алмаштышыже

Р.С. Плотников да молат мурызо-влаклан поян муро чондайым тыланышт. Районысо Ветеран-влак Совет вуйлатыше Ю.Г. Балахнина Нерге ялысе Ветеран-влак Совет вуйлатыше М.А. Гареевалан, ансамбльын активный участницыже-влак Д.С. Александровалан, Т.Я. Байгазовалан, О.С. Ишпахтиналан, Л.Н. Шуматбаевалан тауштыме серышым кучыктыш.

«Ӱжара» дене пырля лӱмгечым пайремлаш Ардаш ял гыч «Акарт», Монар ял гыч «Ший памаш», Мишкан гыч «Муро эм» ансамбльын мурызышт миеныт ыле.

Э. АПТУЛМАНОВА.

Снимкыште: "Ӱжаран" пайрем коцертыштыже.

Моло фотом тиде сайтысе фотогалерейыште ончыза.