Сай бухгалтер да повар

27 октябрьыште нылымше курсышто тунемше Светлана Баязова «Повар паша» компетенций дене (производственный туныктымаш мастерже Л.К. Аспаева) Уфасе отраслевой технологий колледжыште эртыше таҥасымашке миен. 

Самырык поварлан голландез соусым да пюре-шӱрым ямдылаш кӱлын. Эксперт-влак конкурсант-влакым тӱрлӧ велым аклат. А республика але эл кӱкшытыштӧ шке мастарлыкым ончыктымо годым чылажымат: могай вургемым чийымым, ӱзгарым кузе кучылтмым, паша верын арулыкшым, правилым палымым, шке моштымаш ден шинчымашым арален кертмым - шотыш налыт. Мемнан студентна колледжын лӱмжым волтен огыл, вич эн сай самырык профессионал радамыш логалын! 

29 октябрьыште Никита Привалов «Бухгалтерский учет» компетенций дене (производственный туныктымаш мастерже В.П. Ишмурзина) шинчымашыжым ончыктен. Тиде гана таҥасымаш Мелеузысо шуко профилян профессиональный колледжыште лийын. Конкурс годым организацийыште бухгалтер учетым намиен, отчетым ыштен моштымым да молымат ончыкташ кӱлын. Заданийым шуктымо годым бухгалтер учетым автоматизироватлыме программа-влак дене (1С; Предприятие 8.3) пайдаланеныт. Н. Привалов келге шинчымашым ончыктен, тудым лу эн сай конкурсант коклаште палемденыт.