Мишкан селасе агропромышленный колледжын тунемшыже ден мастерже-влак ты сеҥымашын «тамжым» шижын шуктеныт, да, векат, сай пример молымат ты корным умбакыже такырташ кумылаҥдышаш. А мокталташ амал лектынак шога - нуным эше ик сеҥымаш дене саламлен кертына. 26-27 октябрьыште Туймаза агропромышленный колледжыште «Самырык профессионал-влак» VII региональный чемпионат кышкарыште «Кермычым оптымаш» компетенций дене ойыркален налме таҥасымаш-влакым эртареныт. Тиде гана мемнан колледж гыч тушко икымше курсышто тунемше М. Аймурзин да тудын наставникше, производственный туныктымаш мастер Г.П. Искаков мийышт. Максимлан кум тӱсан кермыч гыч, тӱрлӧ йӧным кучылтын, орнамент дене сӧрастарен, изирак «пырдыжым» опташ кӱлын. Рвезе ты пашам сайын, моштен шуктен да, эн шуко баллым поген, икымше верым налын.
Г.П. Искаковын тунемшы-же-влак коклаште ончычат сеҥыше-влак ыльыч. 2020-шо ийыште 12-шо группышто «Чумыр чоҥымо пашан мастерже» специальность дене тунемше Вадим Валеев «Самырык профессионал-влак» VI региональный чемпионатыште «Кермычым оптымаш» компетенцийыште 2-шо верым налын ыле. Чемпионатлаште сеҥымаш колледж тунемше-влакын наставникышт Г.П. Искаковын опытшо, лым лийде тыршымыже, шке профессийжылан ӱшанле улмыж нергенат ойла.