Самырык мӱкшызӧ-влак коклаште Вадим Муртазин сеҥен

Самырык профессионал-влакын Башкортостанысе командышт дене пырля Мишкан агропромышленный колледжын студентше Вадим Муртазинат (снимкыште) республикын чапшым арален. Тудо «Мӱкш ончымо сомыл» компетенцийыште 16-22 ияш-влак коклаште вийжым терген. 

Эн виян-влак коклаште икымше вер верч кучедалаш куштылго огыл, вет молат таҥасымашлан чот ямдылалтыныт, келге шинчымаш, чытыш да вий-куат дене ойыртемалтыныт. Самырык мӱкшызӧ-влаклан 6 модуль гыч шогышо заданийлаште мӱкш еш-влакым телылан кузе ямдылымым, авадыме ешым виян дене ушымым, мӱйым кушеч погымым, тудын физический свойствыжым рашемдымым, 

омарташ рамылам шындылмым, мӱкш-влакын черыштым пален налмым да нуным эмлымым да шуко моло шинчымашым почын пуаш кӱлын. Вадим тудын ончылно шындыме задачым сайын шуктен, шым еҥ коклаште эн шуко баллым поген да абсолютный сеҥышыш лектын! 

Рвезым тиде чемпионатлан ямдылыше наставникше - производственный туныктымашын мастерже-влак К.Ю. Михайлова, К.Д. Кутлуметов нергенат поро мутым каласен кодынем. Нуно рвезылан мӱкш ончымо пашан чыла секретшым почын пуэныт, а Ксения Юрьевна WorldSkills таҥасыме площадкыште эксперт-компатриот семынат тыршен. Чумыр тыршымашын лектышыже моткоч куандарыше. Ме Вадим Муртазиным уло кумылын саламлена! 

Мишкан агропромышленный колледж гыч колтымо фото-влак.