ППМИ-2026: ППМИ программа полшымо дене

Шаран район Уялыште тиде проект почеш урем корным тӧрленыт, жаплан келшыше йоча площадкым ыштеныт. 2026 ийыште Уял калык уэш ППМИ программыш пураш пунчалым луктын. Декабрь мучаште кум гана - Уялыште, Мешер йочасадыште да школышто - погынымашым эртареныт, калыкым тургыжландарыше пӱсӧ йодыш-влакым лончыленыт да тиде гана программа полшымо дене ялысе йоча площадка йыр кӱртньӧ печым печаш материалым налаш кутырен келшеныт.

Иктешлыше погынымашым тений 5 январьыште Уял уремыште эртареныт. Тушто тиде пашам ворандараш калык деч оксам погымо йодышым каҥашеныт, верысе администраций да кугыжаныш мыняр ойырышашым умыландареныт да 10 чолга еҥан инициативный тӱшкам сайленыт. А чумыр сомылым ял староста Р.М. Иркина вуйлаташ тӱҥалеш. 

Конкурсышто сеҥаш манын, ял калык кыртмен тыршышаш, ятыр тӱрлӧ мероприятийым эртарышаш. «Ял илаш тӱҥалеш але уке - мемнан деч шога. Ончыкыжат изижге-кугужге тыршена гын, ППМИ - 2026 конкурсышто сеҥаш ӱшанна кугу. Тек ялна умбакыжат пеледеш да тӱзлана!» - манеш Уялын депутатше Раиса Иркина.

Ме ӱшанена: нуно теният конкурсышто сеҥат да ялыштым тӱзатыме пашам умбакыже шуят. Кӧ кава гыч волен вочмым вучен ок шинче, ситыдымаш-влакым кораҥдаш йӧным муынак шога.