ППМИ-2026: Ялнам пырля тӱзландарена

...Калыкнат Ленде ден

                                Пӧкла гае

Ваш келшен, ик ой дене ила.

Вашлиеш ӱжарам эр эрдене,

А кастене шыпак ужата.

Тыршалеш изи мӱкш гай 

                                пашаште,

Муэш жапым тыгак 

                               каналташ.

Паша дене сурт сомыл 

                                коклаште

Шочмо ялым тырша            

                              тӱзаташ!..

Тыге воза Пӧкленде ял калыкше нерген шке почеламутыштыжо Роза Алпаева. Чынжымак, мемнан Пӧкленде ялыштына ял верч тыршыше, икте-весылан ваш-ваш полшен шогышо калык ила. Кеҥеж ма але теле, эр ма але кас, ончылгоч каҥашен келшен, ял тӱзатыме ятыр сомылым шуктат. Садланак ялна шуко гана районысо конкурслаште икымше верым наледен.

Ялнам тӱзатыме пашаште мемнан Чорай сельсовет администрацийын вуйлатышыже Г.А. Саймулукованат надырже кугу. Теве теният тудо, Пӧкленде калыкым чумырен, верысе инициативылан полшымо программыш ушнаш каҥашым пуыш, вет ППМИ-ште участвоватлымаш уло яллан пайдале лийше проект-влакым илышыш шыҥдараш йӧным пуа.

Галина Андреевна погынымаште конкурсышто участвоватлымын условийжымат рашемдыш: верысе муниципалитет, спонсор-влак да ял калык могырым софинансирований лийшаш. Пӧклендыште патриотизм шӱлыш чотак шижалтеш: ял клубыш погынымашке чумыргышо калык ик ой дене ППМИ-шке ушнаш реза лие. Еҥ-влак Ленин, Октябрьский да Рӱдӧ уремлаште корным тӧрлаш кутырен келшышт. Проектым илышыш шыҥдарыме пашам шукташ инициативный тӱшкам сайлышт. Тыгак калык деч мыняр оксам погышашым рашемдышт. 

Инициативный тӱшкалан конкурсышто участвоватлыме пашам ворандараш ял калык чот полша. Лекше йодыш-влакым, шуктышаш паша нерген пырля погынен каҥашат, тӱрлӧ субботникым да оҥай мероприятийым эртарат. Ме ӱшанена: пырля тыршыме дене ялнам тӱзландарен да илаш эшеат йӧнанракым ыштен кертына!