ППМИ - 2026. Корнынам тӧрлынена

20 ноябрьыште ончылгоч погынымаште проект почеш шуктымо паша да условий дене палыме лийна. 28 ноябрьыште ял калык кокымшо погынымашыш чумыргыш. Мичурин да Лесной уремлам ошма да тыгыде кӱ дене тӧрлаш кÿлмӧ нерген мутланышна, спонсор полышын да калык деч погымо оксан кугытшым палемдышна, инициативный тӱшкам сайлышна. Ты сомылым ялнан чолга еҥже-влак Г.Н. Ильбахтин, Р.П. Иштыганова, Р.А. Ишмурзин, Н.П. Аптыкова, С.С. Ялитов, А.С. Шайбакова, А.С. Ялитов, С.Р. Ялитова шукташ тӱҥалыт.

«Мыланна сай корно кÿлеш» шонымаш дене ППМИ - 2026  ушнен, кундемнам  тÿзатыме верч шуко поро пашаш ушнышна да ончыкыжат ушнаш шонена. Кугу Ачамланде сарыште кредалше да вуйыштым пыштыше землякна-влаклан шогалтыме памятник воктене субботникым, марий йÿла почеш Ятас пайремым эртарен колтышна. Аван кечыже вашеш школысо тунемше-влак да «Изэҥер» ансамбль концерт дене куандарышт, ава-влакым ялысе клубыш чай йÿаш ӱжыч.

СВО каен шогымо неле жапыште салтак-влаклан полшаш кÿлмымат сайын умылена. Тынбай ялысе ÿдырамаш-влак дене пырля маскировка сетьым пидна. Шукерте огыл Леонид Алкаев СВО-ш 20 мужыр выньыкым колтыш. Тек мемнан полышна салтак-влакын илышыштым арален кодаш полша, шочмо кундемыш таза-эсен пӧртылаш вийым ешара, вуй ӱмбалнына яндар кава да тыныс илыш лиеш! 

Тыгай шонымаш дене илена да ял илышнам саемдаш тыршена. ППМИ - 2026 проектыште сеҥыше радамыш логалына гын, мемнанат сай корнына лиеш манын ÿшанена.