ППМИ. Эх, куанже мыняре!

Кугыеҥ-влакынат кидыштышт транспорант коеш. Кужнур ял поселенийын вуйлатышыже Р.Р.Байрамов ача семын икшыве-влаклан рыҥ шогалаш командым пуыш.

Ялын эн шоҥго озаже - Юзо тумо - йымалне шыпак шогена. Р.Р.Байрамов мутым нале: «Таче пеш сай сомыл ден чумыргенна! Ме тендан дене, пагалыме ял калык, «ППМИ-2025» проект дене сеҥышыш лектынна. Спортивный тренажер-влакым налаш да уремыштына вераҥдаш тыршымынан лектышыже тыгай: проектын чумыр акше 1 500 000 теҥгеш шуын.Тышеч Пошкырт Республикынан субсидийже - 1 100 000 теҥге, район 165 000 теҥгем пуэн, а ял калык ден спонсор-влак деч полыш семын 235 000 теҥге пурен. Тендан полшымыда да тыршымыда арам лийын огытыл. Погынен толмыланда пеш кугу ракматым каласем». 

Умбакыже мутым ялысе пагалыме туныктышо, кызыт сулен налме канышыште улшо Е.Е. Калимьяновлан пуымо. Тудын каҥашыже тыгай ыле: «Пагалыме кугыеҥ да туныктышо-влак! Йочада деч вараш ида код, тиде тендан вийда, кажне тренажёрын молан кӱлеш улмыжым чын кучылтыда гын, тазалыкланда моткоч кугу пайдам ыштеда. Тазалыкдам шуараш ида ӧркане, толза веле!» 

Тиде сооруженийым аклаш да саклаш кӱлмӧ нерген М. И. Файрузова да Н.В. Ахмадееван мутышт деч вара уремысе спортивный тренажёр тӱшкам почмаш церемоний тӱҥале. Тиде - куанле мероприятийын тӱҥ татше. Кужнур ял ветеран-влакын советым вуйлатыше Нина Ахмадеева да сӱретче Ефрем Калимьяновлан ӱшанен, йошкар тасмам пӱчкаш вашкӱзым кучыктымо. Пӱчмӧ лаштыкым мыланем, Кужнур кыдалаш школын тӱҥалтыш классыште туныктышылан, кучыктымек,  мыйынат тыланымашемым каласаш кумылем лекте: «Йоча-влак, тыланда таче могай кугу пӧлек ышталтын. Те моткоч пиалан улыда! Тиде школ стадионышто тренажёрлаште вийдам ешараш, тазалыкдам пеҥгыдемдаш тӱҥалыда гын, ме пеш куанена. Модмо, вий шуарыме вердам арун кучыза!». 

Теве ынде изижге-кугыжге могай-гынат тренажёрыш шинчынат, шогалынат ончат. Южо еҥже пуйто ӱшаненат ок шукто, аптыраненрак, куаным шылтен кертде, шыргыжал колта. Кузе от куане, вет меат ынде оласе калык деч пырчат кем огыналыс!

А эше каласен кодынем: тыгай неле сомылым - калык дене мутланыме да умылтарен моштымо пашам - ялысе инициативный тӱшка моштен ыштен да  чот тыршен. Нунылан поро деч поро мутым каласена. Тиде мемнан пеш яса да чытамсыр кумылан пагалыме еҥ-влак: Н.И.Асылбаева; И.Н.Асмаева; С.Э. Антонова; О.Г.Изибаева; А.Д.Иликбаева; И.А.Ираева; Н.П.Сайранова; О.Н.Кугубаева; З.И.Михайлова; М.И.Файрузова. Ончыкыжат тыгай кӱлешан тарватыме пашашкышт ушнен, нуным эре кумылаҥден, полшен шогаш веле кӱлеш, шонем.