«Бригантина» ППМИ программыш ушна

ППМИ программым тӱрлӧ пунчалым лукмашке граждан-влакымат ушнаш кумылаҥдыме пайдале йӧн семын палемдыман. Тудо еҥ-влакын кӱлешан йодыш-влакым решатлаш да инфраструктурым саемдаш темлыме ойыштым поддержатлаш ышталтын. Погынымашыште темлыме кажне проект ППМИ конкурслан келшыме шотышто тергымашым эртен.

Тений «Бригантина» лагерь, кеҥеж каныш годым икшыве-влаклан йӧнан да лӱдыкшыдымӧ лийже манын, икмыняр ойым темлен. Тиде - спорт площадкым уэмдымаш, илыме корпус-влакыш кӱлеш наре ӱстелым да пӱкеным налмаш, йырым-йырысе кумдыкым тӱзатымаш да изи архитектур формылам шогалтымаш. Погынымашке мийыше кажне еҥ йоча канышлан кӱлешанраклан шотлымо ой верч йӱклен кертын.

А еҥ-влакын тыгай пашаш кумылын ушнымышт верысе инфраструктурым саемдаш гына огыл, шкеныштын гражданский позицийыштым пеҥгыдемдашат, йӧратыме Нефтекамск оланам сайракым, илаш йӧнанракым ышташат полша. ППМИ-ш ушнымаш - сай вашталтышым ышташ полшымаш.