Ямдым вучен шинчымын пайдаже ок лий

Мемнан Изи Соказа ял калыкымат кум пӱсӧ йодыш тургыжландара: школыштына тоштемше окна-влакым вашталтыман, шӱгарла печымат уэмдаш кӱлеш ыле, клуб леведышат шӱкшемын…

Шке вий дене гына ниможымат ыштен огына сеҥе, садлан ялыште инициативный тӱшкам чумырен, ты йодышым каҥашышна, ППМИ программыш ушнаш ойым пидна. Эртыше идалыкын пытартыш тылзыштыже калык дене погынымашым эртарышна. 

Школ эн кӱлешан, тушто тунемше йочана-влак кылмен шинчышаш огытыл, калык тидым умыла. Садлан тарватыме кум йодыш гыч иктыжым - школысо окна-влакым уэмдыме пашам - верысе инициативылан полышым пуышо программын конкурсшо гоч илышыш пурташ шонена. Тиде конкурсын условийже почеш пеш шуко пашам шуктышна. Тунемше-влак школышто у окна-влак кӱлмӧ нерген аппликаций-влакым ыштышт, ялысе ӱдырамаш-влак СВО-што кучедалше салтакна-влаклан шокшо носким пидыч, лашкам пӱчкеден ямдылышт, чайшудым коштен оптышт. Икманаш, могай суапле да пайдале пашалан вийна сита, чыла ышташ тыршена. Калыкна пашаче, тыршышан, садлан поро сомылна яралан ок лий, ППМИ программын конкурсыштыжо сеҥена да ялысе йоча-влакын тунемме верышт шокшо да моторрак лиеш манын ӱшанена.