Корным олмыкташ шонена

Эн кÿлешан да тургыжландарыше йодышла гыч иктыже - ял уремысе начар корно. Телым тудым лум петырен кая гын, шошым, шыжым лавыран лакыла гоч эртышашлык огыл. Тидлан кӧра мемнан ялна верысе инициативылан полышым пуымо программыш ушнаш келшен.

Ял калык тиде программыш пураш кÿлмӧ йодышым каҥашен. 8 декабрьысе погынымашыш Мишкан район администраций гыч З.А. Шамсутдиновам, Ардаш ялсовет вуйлатыше Р.А. Сайдугановым ÿжна. Зинаида Анатольевна погынышо-влаклан 2016-2023 ийлаште верысе инициативылан полышым пуымо программа почеш районышто шуктымо паша-влак нерген ойлыш да тудым Башкортостан Республика Правительствын инициативыже почеш илышыш шыҥдарымым палемдыш. Программа яллаште илыше-влакын эн пӱсӧ, верысе кучемын шуктен кертдыме проблемылам рашемдаш да решатлаш йӧным ышта. 

Мутланен келшыме почеш ялысе калык, уремысе корно-влакым ачалаш манын, ППМИ программыш пурымо верч йӱклыш. Тиде сомылым шукташ ик ужаш оксажым калык деч погыман, садлан сурт еда оксам погаш, спонсор-влакым ушаш каҥашышт. Тӧлдӧ ялыште шочын-кушшо, но кызыт вес кундемлаште илыше землякна-влакат ӧрдыжеш огыт код манын шонена - нунымат тиде сай пашам шукташ полшаш йодына.

Погынымашыште программым илышыш пурташ вуйын шогышо инициативный тӱшкам сайлышна. Конкурсышто сеҥымашыш шуашлан нуно программын задачыже-влакым шуктымо пашам виктараш тÿҥалыт. Чылажат шонымо семын лиеш, да вес ийлан ялыштына корным тӧрлат манын ÿшанен кодына. Сай пашан акше ок йом.