Йоча-влакым патриотизм шӱлышеш куштена

1. Ташкиново селасе школышто тунемше-влакым патриотизм шӱлышеш кушташ тунемме верыштым кӱлешан оборудований дене пойдарымаш. 
2. Ташкиново школ воктене велосипед дене кудалыштме корным ыштымаш. 
3. Ташкиново школышто кугыеҥ да йоча-влаклан тачысе кечылан келшен толшо театрым почмаш.  

Чумыр йӱклымаш годым «Ташкиново селасе школышто тунемше-влакым патриотизм шӱлышеш кушташ тунемме верыштым кӱлешан оборудований дене пойдарымаш» проектым йӧпленыт. Йоча-влакым патриотизм шӱлышеш куштымаш тачысе кечылан ик эн кӱлешан сомыллан шотлалтеш. Школышто тунемме жап - самырык тукымлан Шочмо элым пагалыме шӱлышым шыҥдараш келшен толшо пагыт. Патриот - тиде шке элжын озаже, тудым арален моштышо айдеме. Тыгай еҥ шкенжымат арален кертшаш, икымше полышым пуэн моштышаш. Арамлан огыл 2023 ий 1 сентябрь гыч кугурак класслаште тунемше-влаклан ОБЖ уроклаш НВП курсым пуртеныт. 

Тыгай пашам сайын шукташ, патриотизм шӱлышан воспитанийым шот дене ворандараш школышто «предметно-развивающий среда» манме йӧн кӱлешак. Тидлан кӧра, верысе инициативылан полышым пуымо программылан эҥертен, школлан икымше полышым пуаш туныктышо робот-тренажёрым, пожарно-спасательный комплектым, тунемаш полшышо видеофильм, ОБЖ уроклан тӱрлӧ пособий-влакым, оружийым вераҥдыме шкафым, радиационно-химический разведкын изи экспресс-лабораторийжым, аралыше вургем, компас ден противогаз-влакым, гранатомёт ден гранат-влакын макетыштым, транспортный шина-влакын комплектыштым, Калашниковын пулеметшын да Макаровын пистолетшын макетыштым, еҥ-влаклан шылын аралалтме вер-влакын (убежище) макетыштым, СССР жап годсо орден ден медальым, совет салтак-влакын погоныштым, военный вургемыштым, тунемше-влаклан ОБЖ темылан келшен толшо ӱстел модыш-влакым да молымат налаш шонат. 

Кызыт инициативный тӱшка ойырен налме проект почеш пашам намия. Заседанийлам эртара, проектым илышыш шыҥдарыме верч тырша. Тидын лӱмеш школышто 2023 ий 19-29 декабрьыште патриотизм шӱлышан тӱрлӧ конкурсым, акцийым, модышым да марафоным эртарыме. Палыдыме салтакын, Отечествын Геройжо-влакын, Башкортостан Республикын Конституцийжын, Россий Федерацийын кугыжаныш символжо-влак нерген федеральный конституционный закон-влакым лукмо кечыштым кумдан эртарыме. Школын тунемшыже-влак нине мероприятийлашке чолган ушненыт, эн сайже-влакым грамот да диплом-влак дене палемденыт. Ташкиново школын проектше 2024 ийыште верысе инициативылан полышым пуымо программа конкурсышто сеҥышыш лектеш манын ӱшанена.