Кундемнам тӱзена

Кундемысе ялна-влак  моторештыт, тÿзланат да чонлан келшышын илаш йőрышыш савырнат. Мутлан, яллаштына кажне ийын  шагал огыл у сурт чоҥалтеш. А шуко икшыван еш-влакын тиде сомылыш уло кумылын ушнымышт поснак куандара. Теве Атыевмыт ешым налаш. Вич икшыван еш Маядык ял покшелне пеш мотор да кызытсе жапын йодмыжлан келыштарыме кугу у полатым чоҥа. 

Кундемнам тÿзымő паша тыглай гына ок ышталт. Пошкырт кундемысе да Дőртыльő районысо кучем вуйлатыше-влакын  полшымышт  пашалан  кумылаҥден шога. Республикын  да шкенан районысо бюджет кӱшеш тений Ярмия ялыште у фельдшер да акушер пункт чоҥалте. Миниште ялыште кÿварым да пеш кÿлешан вÿдым ситарен шогымо системым олмыктымо. Кодший тыгай сомыл Ярмия ялысе Зеленая ден Полевая уремлаште шукталте. Палемден кодыде ок лий, кÿлешан вÿдым ситарен шогымо йодыш ятыр ий Миниште ялысе калыкын кугу проблемыже ыле. Ынде тиде йодышым решатлыме чыланнам куандара. Тиддеч посна Маядык ялысе йочасад ден спортзал леведышым саемден алмаштыме, ялысе тÿвыра пőртым тőрлымӧ паша шукталте. «Единая Россия» партийын верысе пőлкаже полшымо дене Тошто Кангыш ялыште тÿвыра пőрт леведышым вашталтышна. Эше шуко пайдале пашанам палемдаш лиеш.  

Да, паша шуко ышталтын, но ончылнына  кÿлешан да чоннам куандарыше  эше ятыр сомыл вуча. Ыштыме да чон канен илыме шуэш! Но ял калык умыла: шонымым илышыш пурташ шке вий гына ок сите. Садлан шукерте огыл Маядыкыште эртыше погынымашыште  ял калык верысе инициативылан полышым пуымо программыш  ушнаш ойым пиде да Маядык ялыште йоча площадкым ышташ кÿлмö проектым эн кÿлешанлан шотлыш. Погынымашыште программылан вуйын шогышо инициативный тӱшкам сайлыме. Тудо шке пашажлан вигак пиже.

Мемнан ял калыкын верысе инициативылан полышым пуымо программын проектшым ойырен налме пашашке ушнымо шотышто ончычрак эртарыме погынымашыште Россий Федераций Кугыжаныш Думын депутатше Рима Баталова, Дöртыльö райсоветын секретарьже Венера Файзиева да Дöртыльö район администрацийын еҥже-влак калыкым тургыжландарыше йодыш-влаклан тичмаш вашмутым пуышт. 

Маядык ял калык, тышан шочын-кушшо да öрдыж кундемлаште илыше, ялна уэмже, пеледше, моторештше манын шонышо чыла тургыжланыше чонан еҥат тиде пашаш  уло кумылын  ушна манын тыланен кодына. Кузе тений кеҥежым ялнан кум шÿдö ияш юбилей пайремышкыже рÿж погынышна, айста тиде кÿлешан пашаланнат тугак кыртмен пижына.