«Мыланна корно кӱлеш»

Тиде программа (ППМИ) республикыште кумдан шарлен. Тудым кундемыште БР Правительствын пунчалже почеш 2014 ий годсек илышыш шыҥдарат. Программа дене келшышын, калык, шкевуя погынен, администраций дене пырля шуктышаш пашам палемда. Тиде сквер ден парк, йоча площадка-влакым тӱзатымаш, корныш асфальтым шарымаш да молат. Башкортостан Республикын бюджетше гыч тиде пашалан 1,2 миллион теҥге наре субсидийым ойырат. Проект-влакым софинансироватлаш ола округын бюджетше гыч ойырымо шийвундо 15% деч, калык деч погымо окса 4% деч шагал огыл лийшаш улыт. 

Нефтекамск - республикысе самырык ола-влак кокла гыч иктыже. Ола тӱзлана, пӧртым ятыр чоҥат. Частный пӧрт-влакым чоҥымо районыштат илыме сурт ешаралтеш. Тидлан кӧра тушто йырысе кумдыкым тӱзатыме, тудым оласе йырвелын ужашышкыже савырыме йодыш ончыко лектеш. 2022 ийыште тиде программа почеш оласе 16 проект сеҥышыш лектын ыле. Ягодный уремыште илыше-влакат ӧрдыжеш ышт код. 2021 ийыштат ППМИ программыш ушнышт. Тугодым Ягодный уремысе корныш тыгыде кӱм оптымо ыле. 2023 ийлан тӱҥ сомыл - уремысе корныш асфальтым шарымаш. Тиде корным пеҥгыдемда, тыгыде кӱм вӱд йогымо лакылаш шаланыме, грунт дене варналтме деч арала. Ягодный уремыште илыше калык спонсор полышлан РФ Кугыжаныш Думын депутатше Р.Г. Шайхутдиновлан, Нефтекамск ола округ Советын депутатше Ф.Я. Низамовлан, индивидуальный застройка территорий-влак дене пашам ыштыше пӧлкан вӱдышӧ специалистше О.Н. Ермаковалан, индивидуальный предприниматель О.С. Гарифуллинлан кугу таум каласа.