«Корным олмыкташ шонена»

Эн кÿлешан да тургыжландарыше йодышла гыч иктыже - ял уремысе начар корно. Телым тудым лум петырен кая гын, шошым да шыжым лавыран лакыла да колея гоч эртышашлык огыл. Тидлан верчынак ял калык дене тиде программыште участвоватлаш кутырен келшышна. А 8 декабрьыште иктешлыше погынымашыш Мишкан районын тиде программылан вуйын шогышо кураторжо З.А. Шамсутдиновам, Ардаш ялсовет вуйлатыше А.М. Ильтубаевым, Мишкан райсовет депутат С.Ю. Васюткиным ÿжна. 

Зинаида Анатольевна районышто 2016-2022 ийлаште верысе инициативылан полышым пуымо программа почеш шуктымо паша-влак нерген ойлыш да тиде программа Башкортостан Республика Правительствын инициативыж почеш илышыш шыҥдаралтмым палемдыш. Тудо яллаште калыкын палемдыме эн пӱсӧ проблемылам решатлаш виктаралтын. Проектын цельже - верысе властьын решатлен кертдыме проблемылам рашемдаш да решатлаш.

Мутланен келшыме почеш Лепешкан калык, уремысе корно-влакым ачалаш манын, ППМИ программыш пурымо верч йӱклен. Но тиде сомылым шукташ ик ужаш оксажым калык деч погыман, садлан сурт еда оксам погаш, спонсор-влакым ушаш кутырен келшеныт. Тыгак Лепешкан ялыште шочын-кушшо, но кызыт вес кундемлаште илыше землякна-влакат ӧрдыжеш огыт код манын шонена -  нунымат тиде сай пашам шукташ полшаш йодына.

Погынымаште программылан вуйын шогышо инициативный тӱшкам сайлыме.  Нуно, тиде проектыште сеҥымашке шуаш манын, программын задачыже-влакым шуктымо пашалан вуйын шогаш тÿҥалыт. Чылажат шонымо семын лиеш да вес ийлан ялыштына корным тӧрлат манын ÿшанен кодына.