Школым пырля тӱзатат

Нефтекамск оласе 16-шо школ тыгай проектыш кумшо гана ушныш. Программа полшымо дене омса-влакым вашталтыме, нылымше пачашыште пластик окна-влакым шындыме. Нуно илышын кызытсе йодмашыжлан да чыла стандартлан келшыше улыт. У окна-влаклан кӧра школышто эшеат шокшырак да моторрак лие, чонланат куанле. Ынде тошто да шӱяш тӱҥалше окна-влак кумшо пачашыште кодыныт. Нуным школым чоҥымо годсек ик ганат вашталтыме огыл. Тоштемше конструкций пуракым, йӱштым колта. Янда-влак шелышталтыныт, пу гыч ыштыме кышкар-влак тоштемыныт. Тидлан кӧра окна-влакым мушкаш да пӧлемыш яндар южым пурташлан почаш ок лий, нуно шокшым огыт кучо. Школ кӧргым ырыктыме годым энергоноситель-влакын роскотышт кугемеш. 

Школыш йоча-влак шинчымашым налаш мият. Тудо - икшыве-влаклан кокымшо сурт, эн оҥай мероприятий-влакым эртарыме вер. Тыште нуно кугемыт, уш-акылым погат. Тунемме веле огыл, йоча-влак икте-весе дене вашкылым ыштат, мутланат. Кызытсе жаплан келшен толшо окна-влак зданийын эстетика тӱсшым тӱжвачынат, кӧргӧ гычат саемдат, лӱдыкшыдымылык шотышто аралат. Тиде ачалыме да школым шокшемдыме роскотым ятырлан шагалемда.