Шонымаш дек кугу ошкыл

Ӱдыр-рвезе-влак каникул годым проект почеш рекреационный зоно-влакым: музыка залым, спорт площадкым, кызытсе физика кабинетым - почыныт, но «Эксплораториум - шанче лабораторий» проект эн шуко йӱкым погыш. Йӱклымаш школ холлышто эртыш: тунемше-влак келшыше проектым ойырымо бюллетеньыштым яшлыкыш оптеныт.

Йӱклымаште инженер классыште тунемше-влакын темлымашышт сеҥыш. Тиде проектын ончыкылыкшо кугу лийшаш - тудо мемнам профессиональный пашалан кумылаҥден шогаш, шанче пашашке ушнаш полшаш тӱҥалеш. Пеш куандара, тиде пашаште профильный предмет-влак - физика, информатика, математика да химий дене шинчымашна сайынрак пойдаралтеш. Чыла тиде латикымше классын инициативный тӱшкажын темлыме проектлан корным почын. Уло школ дене нунылан вес этапыштат сеҥымашышке шуаш тыланен кодына.