Тек йӱдымат уремыште волгыдо кава лиеш

Маядык ялсовет администрацийым вуйлатыше А.И.Ишалин ППМИ программын полшымыж дене ялысе илышыште мом уэмдаш але чоҥаш лийме нерген умыландарыш. Икманаш, ялыште верысе озанлыкым виктарыме, тӱзатыме, корнылам тӧрлатыме да моло сомылымат ворандарен колташ тиде программын йӧнжӧ пеш келшен толеш.

Погынымашыште Советский уремым шотыш кондымо, ялысе вӱдпуч   корным  ачалыме, уремысе электротулым саемдыме кум проект гыч пытартышыжым ойырен нальыч. Погынышо 59 еҥ гыч 43-шо лач тидын верч йӱклыш. Умбакыже пашам ышташ 8 еҥ гыч шогышо  инициативный тӱшкам сайлышт, тудым вуйлаташ ялысе тӱвыра пӧртын директоржо, чолга ӱдырамаш Ф.Т.Сахиповалан ӱшанышт. Верысе депутат, библиотеке пашаеҥ, туныктышо, паша ветеран да моло чолга ялче-влакым ушышо пашаче тӱшка Тошто Каҥгыш ялын йӱд уремжым яндар  кава гай  волгалтарыше проект верч кучедалме конкурсышто сеҥымашке конда манын чылан ӱшанат.