Шонымашке шуаш полшыза

2018 ий 9 октябрьыште Нефтекамск оласе 31-ше йочасадыште эртыше предварительный погынымашыште ача-ава-влак тиде программыш ушнаш каҥашышт. 4-ше микрорайонышто илыше-влак тӱрлӧ инициативым темлышт: йочасад кудывечыште асфальтым уэмден вакшаш, модмо площадкылаште у оборудованийым шогалташ. Туге гынат собранийыш погынышо калык «31-ше йочасад МАДОУ-се приёмный пӧлем-влакым тичмаш ачалаш да ырыктыше шкаф-влакым вераҥдаш» приоритетный проектым ойырен нале.

2018 ий 17 октябрьыште иктешлыше погынымашыш чумыргышна. Тунам ача-ава-влак тиде проектым пеҥгыдемдышт да «31-ше йочасад МАДОУ-се приёмный пӧлем-влакым тичмаш ачалаш да ырыктыше шкаф-влакым вераҥдаш» проект дене тиде конкурсыш ушнаш йодмашым пуаш келшышт.

2.4.1.3049-13 СанПиН-ын кӱштымыж почеш йочасадысе кажне группышто йолчиемым да вургемым кошташ посна вер лийшаш. 31-ше йочасадлан 2019 ийыште кумло вич ий темеш. Тынар жаплан йолчиемым шындаш ыштыме пуч-влак ырыктымым чарненыт, вургемым вераҥдыме шкаф-влакат тоштемыныт. Телым, кӱжгӧ, шокшо вургем дене куржталын, лумым кышкылт модын, йоча-влак пӱжалтыт, нӧрат. Но вургемыштым нигушан кошташ.

ППМИ - икшывына-влакын тазалыкыштым аралаш да нунылан йочасадыште пайдале условийым ышташ сай йӧн. Ӱдыр-эргын тазалыкше ача-авалан эн шерге, а тудым пеҥгыдемдаш - йочасадын тӱҥ задачыже. Ме, 31-ше йочасадыш коштшо икшыве-влакын ача-авашт, конкурсын комиссийже проектнам ойырен налеш да тӱшка вий дене шонымашкына шуына манын ӱшанена.

В. НАСРЕТДИНОВА, Р. ХАКИМЬЯНОВ, инициативный группын еҥже-влак.