Ачалаш жап шуын

«ДЮСШ - олаштына спорт илыш шолмо рӱдер. Тыште всероссийский, элысе, оласе таҥасымаш-влакым эртарат. Тӱрлӧ кундемла гыч толшо уна-влак ончылно шкенам шот дене ончыктыман, нуно сай спорт школым ужын кайышаш улыт», - каласыш Кувыкин уремысе 9-ше пӧртыштӧ кугураклан сайлыме Гульнара Шакирьянова. «1000 икшыве заниматлыме спорт школым шукертак капитально ачалаш жап шуын. Панель кокласе ушем-влак тоштеммылан, верын-верын отмосток шелышталт пудыргымылан кӧра зданий эркын шаланен кертеш, пӧрт негызыш да кӧргыш вӱд логалеш. Окнасе пу рама-влак тоштемыныт, шокшым огыт кучо, сӧралынат огыт кой. Нунымат вашталтыман», - ешарыш ача-ава комитетым вуйлатыше Альфия Нургалиева. Тренер-преподаватель да ача-ава-влак ты проектым йӧплаш темлышт.

Погынымаште «ДЮСШ зданийын тӱжвал велжым да отмостокшым капитально ачалымаш, окналасе пу блок-влакым ПВХ конструкций дене алмаштымаш» проект дене верысе инициативылан полышым пуымо программыш ушнаш, софинансированийлан оксам погаш пунчалым луктыч. Тиде ой дене чылан келшышт.

Икымше ошкыл ышталте. Ты программа почеш мемнан проектнамат ойырен налыт, да вес ий икшыве-влак ачалыме, шокшо, волгыдо помещенийыште заниматлаш тӱҥалыт манын ӱшанена.

Н. СУЛТАНОВА, инициативный тӱшкан еҥже.