Ташкиново уэмеш

Мутат уке, калык школланат кугу тӱткылыкым ойыра, вет йоча-влак - мемнан ончыкылыкна. Нунылан илышыште чын корным ойыраш, шотан айдеме лийын кушкаш сай условий кӱлеш, тачысе кечылан келшыше образований ончыл верым налын шогышаш. Ялысе йоча вожылшанрак, у технологий-влак деч изишак лӱдшырак улеш. Ташкиново селасе калык тидым сайын пала, сандене, ӱдыр-рвезе-влак шкем ончыкташ ынышт вожыл манын, чыла условийым ышташ тырша. Пытартыш кум-ныл ий жапыште тысе школышто шуко вашталтыш лийын: у пластик окна-влакым шындыме, кажне ийын у оборудованиян кабинет-влак шукемыт. Мутлан, йоча-влаклан йот йылмым тунемаш йӧнан лийже манын, школышто лингафон кабинетым почмо, физике, химий да биологий уроклаште материалым илыш да практике деке лишемден эртараш кызытсе жаплан келшыше лабораторный оборудованийым налме. Школын тӱжвал тӱсшат пӱтынек вашталтын, яндарештын.

Теният Ташкиново селасе калык ППМИ программылан шке проектшым темла - селаште у спорт площадкым ыштынеже. Кызытеш йоча-влаклан физкультур дене заниматлаш, спорт модыш-влак дене тӱшкан погынен модаш келыштарыме вер уке. Тиддеч посна, тунемше-влак дене кӱлеш семын занятий-влакым эртараш манын, логопед ден психологын чыла шотыштат йӧнештарыме кабинетышт лийшаш. Кызытсе саманыште нине специалист-влак йоча-влак дене кажне кечын кутырышаш улыт. Тыгак школышто чыла кабинетым интерактивный экран дене оборудоватлыме огыл, туныктышо ден тунемше-влаклан занятийлан ямдылалташ оборудованият ситен ок шу…

Ташкиново калык нине проблеме-влакымат решитлынеже. ППМИ шонымашыш шуаш полша манын ӱшанат.