Спорт площадкым ышташ кумылаҥынна

Тачысе кечылан Корак ялыште калыкын каныме да спорт дене заниматлыме верже уке. Тиде мыланна кугу нелылык. Тыгай вер лиеш гын, калык спорт деке кумылаҥеш, шке тазалыкшым тӧрлатен кертеш. Спортсмен-влакат шукемыт ыле, вет ял калык спорт деке шӱман. Корак ялыште ныл шӱдӧ нылле кок еҥ ила. Тушеч шӱдӧ утлаже - рвезе калык.

Ноябрь тылзыште ял клубышто погынымаш эртыш. Тушто верысе чолгалыклан полшымо программа шотышто каҥашымаш лие. Шушаш ийыште ял калык уэш ты программыш ушнаш кумылаҥе (2018 ийыште Корак ялыште, верысе чолгалыклан полшымо программылан эҥертен, Кугу Ачамланде сарын ветеранже-влаклан обелискым чоҥымо.) Вашлиймаште икмыняр ойым лукмо, но тушеч иктыжым гына ойырен налаш кӱлын. Ял калык спорт площадкылан оборудованийым налаш кутырен келшыш. Ты программыш ушнаш ямдылалтме пашам шукташлан инициативный группым чумырымо. Шушаш ийыште верысе чолгалыклан полшымо программыш пурышаш верч конкурсышто сеҥаш шонена.