Йоча-влакын тазалыкышт верч йӱкленыт

19-ше йочасадыште ик тӱҥ йодыш - тиде пу гыч ыштыме окна-влакым уэмдымаш. Тидлан кӧра мемнан йочасад тений верысе чолгалыклан полышым пуышо проектыш ушныш. Йочасадыш тудын лишне верланыше пӧртлаште илыше икшыве-влак коштыт, садлан тиде йодыш ава-ача-влакымат тургыжландара.

Иктешлыше погынымашыш нине икшыве-влакын ава-ачашт шукын миеныт ыле. Вашлиймашке мемнан деке оласе Советын депутатше И.И. Губаеват тольо. Тыге тӱшкан погынышо калык тудым изишак ӧрыктарыш. «Тачысе кечын калыкым тыгай погынымашыш чумыраш куштылго огыл. Тиде йочасадын коллектившым пагалымашым ончыкта, сайын виктарыме пашашке кеч-кӧат кумылын ушна. А окна-влак чынжымак тоштемыныт, урем гыч йӱштым пуртат. Нуным вашталташак кӱлеш. Тыршен ыштыше коллектив тиде проектым илышыш шыҥдарымаштат сеҥымашке шуэш манын ӱшанем», - каласыш тудо.

Собранийыш мийыше калык ик ой дене тошто окна-влакым у, кызытсе жаплан келшен толшо, ПВХ конструкциянлан вашталтыме верч йӱклыш. Тиде сомыл изи ньога-влакын илышыштым, тазалыкыштым арален кодаш, йочасадын тӱжвал сынжым саемдаш полша манын ӱшанен кодына.