Спорт площадкым чоҥынена

Нефтекамск оласе 6-шо школ верысе инициативылан полышым пуышо программыш кокымшо ий почела ушна. Верысе калыкын, 8-ше микрорайонышто илыше-влакын (Сеҥымаш урем, 4-ше пӧрт), йоча-влакын ава-ачаштын полшымыштлан кӧра кудымшо школышто тӱзатыме сомылым тарватенна ыле - пластик окна-влакым шындышна. Ачалымаш деч вара школна эшеат сылнеште, но эн тӱҥжӧ - тыште лӱдыкшыдымылык шотышто чыла сай да шокшо.

Кызыт 6-шо школ 2020-шо ийлан ямдылыме верысе инициативылан полышым пуышо программын проектышкыже чолган ушныш. Тидлан кӧра ме тунемше-влаклан сай спорт площадкым пӧлеклен кертына манын ӱшанена. Тушто мини-футбол, баскетбол, волейбол да теннис денат модаш лиеш ыле. Площадке спорт дене заниматлаш чыла шотышто келшен толшо лийшаш. Мландысе сай качестван искусственный леведыш тыште спорт дене заниматлыше йоча-влакын тазалыкыштым арален кодаш, лӱдыкшыдымылык йодышым кӱлеш семын виктараш йӧным ышта. Шонымына почеш, у объектыште кудымшо школышто тунемше веле огыл, 8-ше микрорайонышто илыше чыла икшыве, тыгак туныктышо, ава-ача-влак да оласе калыкат тазалыкыштым пеҥгыдемден кертыт ыле.