+18 °С
Облачно
УФА450
4 Сентября 2024, 06:43
Олаласе уремлаште у автобус-влак ешаралтыныт
Башкортостанын Вуйлыкшо Радий Хабиров «Уфа-Арена» спорткомплексын площадкыштыже «Башавтотранс» предприятийын Уфа ден Нефтекамск олаласе филиалже-влаклан 88 у «НЕФАЗ» автобусын сравочшым кучыктен.
БР Вуйлыкын сайтше гыч налме фото.
«Пытартыш вич ийыште «Башавтотранслан» 1400 утла автобусым нална. Автобус паркым тӱрыснек уэмдышна. Ме «Башавтотрансым» техника шотышто виянракым ыштышна да эн тӱҥжӧ - икоян коллективым чумырышна. Таче тушто тӱҥ шотышто верысе калык пашам ышта, тиде мемнан поянлыкна. Пассажир-влакым шупшыкташлан республика ончыкыжат автобусым ситарыме пашам шуяш тӱҥалеш. Мо сайже, шкенан элыште лукмо транспорт дене пайдаланена», - каласен Радий Хабиров.
Нефтекамск оласе автозаводышто ыштен лукмо автобус-влакым салонышто мо кайымым эскерыше видеонаблюдений система, тахограф, спутник навигаций, уверым вераҥдыме табло, йӱкан автоинформатор, гаджетлан зарядым пуышо USB-порт, инвалид коляскылан вер дене йӧнештареныт. БР Вуйлыкын мутшо почеш, республикын районла ден олалаштыже предприятийын филиаллаштыже пашазе коллективым арален кодымо верч тыршыман. Тидлан пашаеҥ-влак дене сай вашкылым ыштыман, нунын верч азапланыман, тыршыме верыштышт чыла шотыштат сай йӧным ыштыман, пашадарым кӱзыктыман.
