Пел курым пырля

«ЧОЛМАН» ГАЗЕТЫМ МАX-ЫШТЕ ЛУДЫНА!

Абдулян Бикбаевич Акпарс ялыште шочын, но ӱмыржым Сургутышто илен эртарен. Ты ийлаште эре ик организацийыштак электромонтажниклан тыршен.

Мария Мешер ял гыч улеш. Школ деч вара Куровское олаште текстильный фабрикыште шӱдырышылан ыштен, вара Октябрьский олаште штукатур-малярлан тунемын.

- Сургутышто чоҥымо пашаште ыштенам, аптекыште кассир, бухгалтер лийынам. Нимогай паша деч ом лӱд ыле. Чыла вереат поро еҥ-влак вашлиялтыныт. Моштен омыл гын, туныктеныт, кертын омыл гын, полшеныт. Чылаштланат тауштен илем! - каласкала Мария.

 - Ме 2011 ийыште Башкирийыш пӧртылна. Суртым шындаш курыканрак верым келыштарышна: пакча гоч памаш чоргыктен йога, ӱлнырак изи эҥер уло. Родо-шочшо-влак полшымо дене пӧртым нӧлтен шындышна. Кеҥежым икшыве-влак ешышт дене толын, полшен шогат, - умылтара суртоза.

Чынжымак, Мария ден Абдулян илыме верыштым мотор сад-пакчаш савыреныт. Тыште 75 ияш пенсионер илымылан ӱшанымылат ок чуч. Ужатат - ӧрат, куанен ончет! Могай гына кушкыл уке: тӱрлӧ сорт вишня, слива, олма, йошкар да шем эҥыж, крыжовник да молат. Кеҥежым бройлерым, лудым ашнаш налыт, тӱрлӧ пакчасаскам куштат.

Кузе калыкыште ойлат: ешым чумыраш йӧсӧ огыл, тудым арален кодаш йӧсӧ. Икте-весым умылышо, пагалыше да йӧратыше еҥ-влак веле кужу ӱмырым пырля илен кертыт. Теве вате-марий Атнабаевмыт 50 ий ваш келшен илат. Нуно таза илыш-йӱлам кучат, пашам йӧратат.

Абдулян шкеак плотник, слесарь, сантехник, сварщик, электрик улеш. Мария чыла пашалан мастар: пидеш, урга, телылан тӱрлӧ кочкышым ямдыла. Унам вашлияш йӧрата, пеш поро ӱдырамаш.

Вате-марий Атнабаевмыт кок эргым да ӱдырым ончен кугемденыт. Нуно ешышт дене Сургутышто илат, илышыште шке верыштым муыныт. Коча-кова 5 уныкалан да 1 кугезе уныкалан куанен илат.

Пырля илаш - пел паша, тӱҥжӧ - икте-весылан йӧратыме да йӧратыше эҥертыш лийын кодаш, ойгым, куаным лош пайлаш. 50 ий - кужу илыш, ятыр ий пырля ыштыме куштылго огыл пашан саскаже.

Пагалыме лудшына-влак, ВК ден Одноклассники соцлаштыклаште вераҥдыме уверым каҥашаш ушнаш ӱжына!