Молан лач ош турня-влак?

«ЧОЛМАН» ГАЗЕТЫМ МАX-ЫШТЕ ЛУДЫНА!

Кавказ калык-влакын легендышт ойла: кредалмаште вуйым пыштыше сарзе-влак огыт коло, нунын яндар чонышт лум гай ош турняш савырна да кӱшкӧ нӧлталалтеш. Дагестан поэт Расул Гамзатовын мотор, ойган легенда негызеш возымо почеламутшылан композитор Ян Френкель семым келыштарен, да тыге «Журавли» мурым тӱнямбалнат палаш тӱҥалыныт. 

Кузе кавказ легенда тӱнямбал символыш савырнен? Тидлан кум амал полшен.

Икымше. Кавказыште илыше калык-влак ожнысек ӱшаненыт: шочмо эл верч колышо, шке порысыштым чын шуктышо джигит-влак шулдырым налыт. Шочмо верысе курык да аул-влак ӱмбач чоҥештен эртышыштла, пуйто мландӱмбалне кодшо лишыл еҥыштым кычкырен ӱжыт, а нунышт, кавашке ончен, кайык коклаште родо-тукымыштым палаш тӧчат. 

Кокымшыжо 1963 ийыште Йӱдвел Осетийысе Дзуарикау селаште Кугу Отечественный сарыште колышо шым иза-шольо Газдановмытлан шогалтыме чапкӱ дене кылдалтын. Монумент ойган авам да чоҥештен кайыше шым кайыкым шарныкта. Расул Гамзатоват тиде памятникым ужын. Кавказ легенда шӱмыштыжӧ моткоч келге кышам коден, вет тудынат изаже-влак сареш коленыт. 

Кумшо амалже Хиросимын историйжым ушештара. Японий мучко коштшыжла, Р. Гамзатов лучевой чер дене черланыше, кагаз турня-влакым ыштылше ӱдырын, Садако Саскакин, историйжым пален налын. Поэтлан паремаш ӱшаным пуышо кайык-влак нерген япон ой да сарзе-влакын чонышт нерген кавказ миф коклаштышт ала-кузе ӧрыктарышын келшен толмыла чучын, да тыге почеламут шочын.

Расул Гамзатовлан кӧра Кавказысе ой тӱнямбал сылнымут пайремын - Ош турня-влакын кечыштын (22 октябрь) - негызышкыже возын. Тудо поэзий, калык-влакын келшымашышт да тӱрлӧ кредалмаште колышо-влакым шарныме кече семын палемдалтеш.

Пагалыме лудшына-влак, ВК ден Одноклассники соцлаштыклаште вераҥдыме уверым каҥашаш ушнаш ӱжына!