Погылан налогым тӱлаш ныл амал

«ЧОЛМАН» ГАЗЕТЫМ МАX-ЫШТЕ ЛУДЫНА!

Тений 2025-ше ийыште собственностьыштыда лийше машиналан, мландылан, пачерлан да пӧртлан налогым тӱлыман. Автомашинадам шукерте огыл ужален колтенда гынат, садак тӱлаш логалеш, вет те 2025-ше ийыште тудден пайдаланенда. А 2026 ий тӱҥалтыште налме пачерлан налогым 2027-ше ий шыжым гына шотлат.

Икымше амал. Ты оксам школ да йочасад-влаклан кучылтыт, тудден корным ыштат

Физический лица-влакын погыштлан тӱлымӧ да мланде налог-влак верысылан шотлалтыт (РФ Налог кодексын 15-ше статьяже). Тидыже окса тендан регистрироватлалтме олан але районын бюджетышкыже пурымым ончыкта. Садлан пӧртда воктен корным тӧрлымаште, икшывыда тунемме школым у арвер дене пойдарымаште, ола уремлам мотор пеледыш йыраҥ дене сӧрастарымаште да моло сомылышто тенданат надырда уло.

Ты налог «верысе» улмылан кӧра ставка кугытым да льгот-влакым верысе Советын депутатше-влак пеҥгыдемден кертыт (Но шукыж годым чылан кӱшыч темлыме ставкымак кодат), садлан пошкудо районлаште налогын ставкыже изишлан ойыртемалт кертеш. 

А транспорт налог пӱтынек Башкирийын бюджетышкыже кая. Ты окса дене тошто корно-влакым ачалат, у корным ыштат. Ты налогым Кугыжаныш Собраний депутат-влак пеҥгыдемдат, садлан тудо республикысе чыла район ден олалаште икгай кугытан.

Кокымшо амал. Тидлан кум минут гына кӱлеш

Налогым, банкыш але почтыш коштде, черет да комиссий деч поснат тӱлаш лиеш. Тидым Госуслуги, Налог тӱлышын личный кабинетше але банк-влакын приложенийышт гоч ышташ лиеш. «Налог-влак» разделым почмек, вигак мыняр налогым тӱлышашым ужыда. Тудым темдалза да картын номержым возыза. Тыге пеш куштылгын тӱлен кертыда.

Но тӱткӧ лийза! Тӱҥалтыште чын сайтыште улмыдам тергыза, молан манаш гын южгунам мошенник-влак тугайракак адресан ондалчык сайт-влакым ыштылыт, мессенджер-влакыште шоя ссылкан увер-влакымат колтыл кертыт.

Кумшо амал. Уто проблемыда ок лий

Налогым тӱлыдымылан кӧра илышыште шуко йӧндымылыкыш логалаш лиеш. Икымше, жапыштыже налогым тӱлыдымӧ-влаклан 2 декабрь гыч пеним шотлаш тӱҥалыт - кугытшо Россий Банкын ключевой ставкыжын 1/300 ужашыже. Кызыт ставка 14%, садлан кече еда улшо парымыш кажне 1000 теҥгелан 46 ыр ешаралт кая.

Кокымшо, должник-влакын банк счетыштым, погыштым арестоватлат.

Кумшо, суд пристав-влак исполнительный производствым «почыныт» гын, 30 тӱжем теҥге деч шукырак парыман еҥ-влакым вес эллаш огыт колто. 

Йот элыш каяш чарымым аэропортышто самолетыш шичме деч ончыч писын гына кораҥдаш ок лий. Тидлан жап кӱлеш: порысым, суд пристав службын исполнительский сборжым тӱлыман, ведомство-влак окса пурымым пеҥгыдемдышаш улыт, суд пристав-исполнитель исполнительный производствым мучашлышаш.

Билетым налат, отельым бронироватлет, а аэропортышто трук пален налат - нигуш каен от керт… Икмыняр тӱжем теҥгелан верч тыгай проблема тыланда кӱлеш?

Нылымше амал. Парымдам садак кучен кодат

Кодшо ий мучаште РФ Налог кодексыш тӧрлатымашым пуртеныт. Тудын дене келшышын, налог инспекций судебный, тыгак судебный огыл йӧн денат парымым тӱлыктен кертеш.

Налог уведомленийым налында, а тушто уто пачерым ончыктымо, льготым шотыш налме огыл але иктаж-могай вес ситыдымаш уло гын, «Налог тӱлышын личный кабинетше» гоч але кагазеш возымо заказной серышым колтыман да тушто аргумент ден доказательствым палемдыман. Тыгай йодышым ик тылзе жапыште ончышаш улыт.

Мыняр налогым тӱлаш ыштыме дене келшеда, но жапыште тӱлен огыдал гын, тудым парымлан шотлат. Налог служба парымым палемдыме жапыште тӱлаш кӱлмӧ нерген серышым колта. Тудын шӱдымыжым огыда шукто гын, налоговый гыч взысканий шотышто пунчал толеш. Закон почеш гражданинлан парымжым шке кумылын тӱлаш шым кече пуалтеш, тулеч вара налоговый банкыш гражданинын счетшо-влак гыч оксам списатлыме шотышто порученийым колта, а банк тудын шӱдымыжым шуктышаш.

Налог шотышто парым уло-укем кузе палаш?

«Налог тӱлышын личный кабинетше», «Физический лица-влакын налогышт» приложений але Госуслуги гыч парым уло-укем рашемдаш да вигак тӱлаш лиеш. Госуслугида уке гын, МФЦ офисыш але налог инспекцийын отделенийышкыже миен толаш лиеш.

Пагалыме лудшына-влак, ВК ден Одноклассники соцлаштыклаште вераҥдыме уверым каҥашаш ушнаш ӱжына!