Кабачок икра

Кабачокым кугурак кубик семын, кешырым да шоганым изирак ужашлан пӱчкедена. Кабачокым пушкыдеммеш, изишак вошткойшо лиймеш жаритлена, уто вӱдыжгыжӧ кайышаш. Тудым кӱжгӧ пундашан кугурак кастрюльыш пыштена. Кешырым, тутло пушыжо лекмеш, шагалрак ӱеш жаритлена. Шоганым шӧртнялге тӱсан лиймеш жаритлена, да тудымат кастрюльыш пыштена. Пакчасаскам кажныжым посна жаритлыман. Чыла пырля блендер дене тыгыдемдена (мясорубка гочат колташ лиеш). Кастрюльым плита ӱмбак шындена. Шолаш пурымеке, тулым иземдена. Пудыратен, 40 минут шолтена. Ты жапыште тудым эше ик гана блендер дене тыгыдемдена. Шолмыж годым петыртышым изинрак почаш лиеш. 40 минут гыч кастрюльыш шинчалым, сакырым, пурысым, томат пастым ешарена. Пудыратен, чыла там иктыш ушныжо манын, эше 20 минут шолтена. Тыште 1 кугу совла уксусым ешараш уто огыл. Ямде икрам стерилизоватлыме кукшо банкылаш темкалена, ӱмбакыже калай крышкым пыштена да, пундашыш шовычым пыштыме кастрюльыш шындылын, тушко шокшырак вӱдым ешарен, стерилизоватлаш шындена. Вӱд шолаш пурымеке, 0,5 литран банкым 20 минут, 0,7 литран банкым 30 минут стерилизоватлена. Лукмеке, калай крышка-влакым пӱтыралына, унчыливуя савырен, банке-влакым шокшо одеял дене леведына.