1 октябрь - Илалше-влакын кечышт. Келшен илат

«ЧОЛМАН» ГАЗЕТЫМ МАX-ЫШТЕ ЛУДЫНА!

Ялыште пенсионер-влак шукын илат, шкетын илышыжат уло. Пелашышт вес тӱняш каен, икшывышт посна ила але пелне ешым чумырен. Ӱткӱстӧ ялыште сар деч ончыч шочшо кок еҥ гына кодын: иктыже М. Ибасова, весыже, М. Илибаева, эргышт дене илат. Еҥ-влак нунын декат мияш огыт мондо, могай-гынат кочкышым ыштен намият. З. Губаева сар деч вара, 1945 ийыште шочын, колхозышто дояркылан ыштен, магазин воктенак ила. Пашам пырля ыштыме йолташыже-влак эре тудын дене погынат. Тыге нуно кажне кугарнян, пырля мутланен, чайым йӱын шинчат. Д. Никифорова колхозышто сӧснам ончен. Сӧснам ончышо-влак шагал кодыныт гынат, икте-весышт дене вашлийын, южгынам кутырен шинчат. Ончыч С. Ермакова колхозышто, садикыште поварлан ыштен. Шукыж годым Соня деке С. Айметова, С. Массаева, Л. Алеева, В. Акузина мият, жапым пырля эртарат. Л. Абсаликова да В. Акузина кугу ойган улыт: нунын эргышт СВО-што кредалыт. Пенсионер-влак тидым умылат, нуным шке декышт ӱжыт але погынен мият. Ю. Губаева деке Р. Байрашева, Л. Азинбаева, Т. Янибекова, Л. Абсаликова эре мият. Тудат кугу ойган улеш: шукерте огыл пелашыже вес тӱняш каен. 

Мемнан ялыште еҥ-влак келшен илат, икте-весыштым пагалат, тӱрлӧ пужымылан, шинча вочмылан огыт ӱшане. Ялыште уда койышан еҥ укеат дыр, шонем. Уремыште пошкудышт дене саламлалтын, икте-весым шыргыжалын вашлийыт. Сурт-оралте гыч нимо йоммаш уке. Шкет кодшо пенсионер-влак шукын улыт. Илышышт куштылемын: шукыштын пӧртыш газым, вӱдым пуртымо. Вольыкыштат уло. Казам але шорыкым ончат, южышт ушкалымат ашнат. Нунылан икшывышт-влак эре полшен шогат: шудым, пум ямдылен кодат. Мый пенсионер-влаклан тазалыкым, кужу ӱмырым тыланем. Кугарня кечыда тендам эре куандарыже.

Пагалыме лудшына-влак, ВК ден Одноклассники соцлаштыклаште вераҥдыме уверым каҥашаш ушнаш ӱжына!