Тӱшка вий - кугу вий

«ЧОЛМАН» ГАЗЕТЫМ МАX-ЫШТЕ ЛУДЫНА!

Кодшо шуматкечын ялысе калык поро йӱлаш савырныше субботникыш чумыргыш. Тушко, пӱтынь ял огыл гынат, калыкын утларак ужашыже уло кумылын погыныш. Тиде гана субботникыш Акпарс ялыште веле огыл, Сургут, Набережный Челна, Октябрьский, Туймаза олалаште, Шаран селаште да Серафимовский поселкышто илыше-влакат толыныт ыле. Тыгай тӱшка пашаш 32 еҥ ушныш. Еҥ-влак пеленышт триммерым, шаньыкым, товарым, шорвондым, моло ӱзгарым намиеныт. Пырля погынен, шке вий дене шӱгарлам шотыш кондаш пижыч.

Пӧръеҥ-влак кугу пашам шуктышт. А. Атнабаев, В. Атнабаев, С. Атнабаев, А. Асмеев, Ю. Ибядуллин, В. Исламов, Д. Исламов, Ю. Исламов, А. Саитов триммер дене тушто кушкын шогалше шудым солышт. В. Асылгареев, Б. Атнакаев, Валерий Ахметшин, Владимир Ахметшин, В. Ишкулаев, Г. Николаев, Э. Шамигулов солымо шудым шаньык дене оптышт, воштырым руэдышт. В. Исламов машина да прицепше дене, Л. Миндиярова имньыж дене пеш шуко шудым, шӱкшакым луктедышт. Ӱдырамаш-влак шорвондо дене шӱкшудым удыркален погыстарышт. Субботникыш шке кумылын 84 ияш З.С. Нигматуллина мийыш. Тудо чылалан пример улеш - моло-влак дене иктӧр пашам ыштыш, ик субботникышкат мийыде ок код! Ик поро пашам весе алмаштыш, паша лектыш чылам куандарыш. Акпарс ялын шӱгарлаже шӱкшудо деч эрныш.  

Каласыде ок лий: ялыште тӱшка пашаш лекдыме-влакат улыт. Тыгай койышышт дене нуно шке кугезыштым жаплыдымыштым ончыктат.

Пырля шуктымо пашан лектышыже эре сай, тидым субботникыш ушнышо-влак эше ик гана пеҥгыдемдышт. Паша деч вара Н.М. Давлетова чылаштымат шокшо чай да когыльо дене сийлыш.

Ме тыште илена. Шке кундемнам шке тӱзаташ, сӧрастараш, тудын верч тургыжланаш огына тӱҥал гын, тидым весе нигӧ ок ыште.

Пагалыме лудшына-влак, ВК ден Одноклассники соцлаштыклаште вераҥдыме уверым каҥашаш ушнаш ӱжына!