+17 °С
Облачно
Саман увер
25 Августа , 13:57
Радий Хабиров Краснокам районыш да Агидель олаш миен
Кодшо арнян вӱргечын Краснокам районыш да Агидель олаш Башкортостан Вуйлык Радий Хабиров толын. Краснокам районышто тудо Уразай гыч Керемет марте 43,6 километрыш шуйнышо магистральный вӱд пучым чоҥымо паша дене палыме лийын. Тиде сомылым «Модернизация коммунальной инфраструктуры» федеральный проект почеш шуктат.
БР Вуйлыкын сайтше гыч налме фото-влак.
«ЧОЛМАН» ГАЗЕТЫМ МАX-ЫШТЕ ЛУДЫНА!
Инженерный объект 35 села ден яллаш йӱмӧ вӱдым ситараш йӧным ышта, пожар лӱдыкшыдымылык шотыштат кӱлешан улеш. Тӱҥалме пашам 2027 ийыште мучашлаш палемденыт. Чоҥымо верыште Радий Хабиров районысо сельский поселений вуйлатыше-влак дене мутланен. «Тӱвыра полат да тугай моло объектым чоҥымо деч ончыч еҥ-влакын суртыштышт шокшо лийже, газ, вӱд пуртымо лийышт манын тыршаш кӱлеш. «Модернизация коммунальной инфраструктуры» проектым Президент В.В. Путин изи населенный пунктлаште тоштемше сетьым ачалаш кӱлмылан тарватен», - каласен тудо.
Агидель олаште Радий Хабиров илаш йӧнан вер-шӧрым ыштыме шотышто эн сай проект-влакын элысе конкурсыштышт сеҥымылан кӧра тӱзатыме «Волны Агидели» паркым ончал савырнен, «Идель» тӱвыра полатым реконструироватлыме сомыл дене палыме лийын, республикысе «Мой бизнес» рӱдерын у пӧлкажым шымлен. Депутат, мер ушемын еҥже, СВО-н сарзыже, волонтер-влак дене муниципалитетын общественно-политический да социально-экономический вияҥмашыжым каҥашеныт. Уфимский топливно-энергетический колледжын филиалжым вияҥдыме, СВО-н сарзыже-влакын ешыштлан полшымо, коммунальный инфраструктурым саемдыме, йоча искусство школым ачалыме, инвестицийым пуртымо йодышлан тӱткышым ойыреныт, Агидель олам «Алга» посна экономический зоныш пуртымо йодышымат тарватеныт. Олам вияҥдыме корно семын республика Вуйлык изи да кокла бизнеслан полышым пуымо, социальный инфраструктурым уэмдыме, корным ачалыме, профессиональный образований системым вияҥдыме пашам тӱҥлан шотлен, увертара БР Вуйлыкын сайтше.
