45 ий гыч вашлиймаш

«ЧОЛМАН» ГАЗЕТЫМ МАX-ЫШТЕ ЛУДЫНА!

Чыланжак огыл гынат, латкокытын миенна: Раиса Аймурзина, Анна Апсатарова, Ирина Лекандрова, Элеонора Матвеева Мишкан район гыч, Ирина Шангареева Бирск район гыч, Маргарита Дмитриева, Юлия Мандиева Калтаса район гыч, Люба Ахметшина, Ирина Сагадеева Краснокам район гыч, Галина Валиуллина Шаран район гыч, Аниса Шамратова Янаул район гыч, Виталий Апликаев Нефтекамск ола гыч. Тынар ий эртымеке, икте-весым ужын, кажныж дене ӧндалалтде чытет мо?

Жап моткоч писе, но мыланна кызытат студент годсо гаяк весела да чолга улмына гай чучеш. Вашлиймашна «Комильфо» кафеште эртыш. Ӱстел йыр шичмеке, кажныже шкеж нерген каласкалыш. 65 ийыш тошкалынна гынат, шӱм-чонна дене тугаяк самырык улмына гай чучеш. Кызыт шукынжо сулен налме канышыште улына. Раиса Аймурзина ден Ирина Шангареева школыштак тыршат, йоча-влакым туныктат. Чылан пашан ветеранже улыт, пашам тыршен ыштымыштым кӱкшын акленыт, республикыште гына огыл, Россий кӱкшытыштат палемденыт. Кажныже илыме верыштыже пагалыме еҥ улеш. Коклаштына ял староста, волонтер-влак, 4 ӱдырна мурышо ансамбльын участникше улыт. А кажнынан кугу поянлыкна - йӧратыме ешна, икшывына да уныкана-влак.

Мутат уке, пагалена да шарнен илена Вера Булатовнам. Тудо мыланна класс вуйлатыше гына огыл, кокымшо авана гай лийын - поро мутшо дене мокталтенат колтен, кӱлеш гын, вурсалтенат кертын. Шарнен ончалашыже шуко фотокартычкым колтышна. Вера Булатовна ден Вениамин Иванович Токтаевмыт кызыт пеш мӱндырнӧ илат гынат, кылна кӱрлын огыл: телефон дене мутланена, икте-весе нерген уверым паленак шогена. 

Кафе деч вара ӱдыр-влак Йылыш ялыш унала наҥгайышт. Ончыч Э. Матвееван суртшо воктен чарнышна. Эля ден Олег пелашыже шукерте огыл кок пачашан у пӧртыш илаш лектыныт. Кудывечыш пурымек, шуко тӱрлӧ пеледыш йыраҥым ужын, ӧрын колтышна. «Эля, кузе чыла тидым ончен, эрыктен да вӱдым шавен шуктет?» - манмылан тудо пеш кӱчыкын да раш каласыш: «Мый тидым уло кумылын ыштем». Пӧрт кӧргышт оласе гаяк икмыняр пӧлеман, мебелян, пешак ару. Теве могай пашаче улмаш мемнан йолташ ӱдырна.

Вара Раиса Аймурзина деке кайышна, тудат Игорь пелашыж дене моткоч кугу кермыч пӧртыштӧ ила. Тудынат пакчаже пеш поян. «Ме тыште тӱрлӧ емыжым, саскам куштена. Эргым ден ӱдырем полшаш толыт. Уныкам-влак кеҥеж мучко тыште илат, нуным пашалан туныктем», - куанен ойла Раиса. А пакча шеҥгелныже кӱкшӧ курык, туштак Инак эҥер йога. Пеш мотор вер-шӧр!

Ты вашлиймашым йолташна-влак тыге шарналтеныт.

«Училищым тунем лектын, эл мучко шаланен пытымыланна 45 ий эртен. Но вашлийме годым туге чучо, пуйто тиде 45 ий коклаштына лийынат огыл. Илыш - орава, маныт. Чынак тыге. Ме ик кечылан адак коло ияш мотор, самырык, весела ӱдыр-рвезе лийын шогална. Чоннам шуко тӱрлӧ поро шижмаш авалтыш. Мӧҥгӧ пӧртылна веле, адак уэш вашкерак вашлийме шуэш - вич ий гыч огыл, а ик-кок ий гыч». (Ирина Сагадеева, Краснокам район.)

«Педучилищыште пырля тунемме ӱдыр-рвезе-влак дене тынар ий гыч вашлияш - пеш кугу куан. Ты кечым кажнына чот вучен. Вашлийынна 25 августышто Мишкан селаште. Погыненна латкокытын, чаманен каласаш логалеш, чылан миен кертын огытыл. Кӧмыт лийыныт, чылан шке илышышт, паша, еш, икшыве ден уныка-влак нерген чон почын ойленыт. Куанен каласаш кӱлеш, чыланат илышыштышт чын корным ойырен налыныт, педучилищыште погымо шинчымашым пайдалын кучылтыныт. Сулен налме каныш марте пашам ыштеныт.

Погынымаште весела студент жапым, туныктышына-влакым шарналтенна, пуйто ик татлан угыч самырык жапыш пӧртылынна. Чеверласаш жап шумек, нигӧн ойырлымыжо шуын огыл. Вашлиймашке мийыше-влаклан кугу тау, ты кечым порын шарнен илаш тӱҥалына». (Ирина Шангареева, Бирск район.)

«Педучилищым тунем лекмылан 45 ий эртен, а чылажат теҥгече веле лиймыла чучеш. Ямле Мишкан селаште пеш мотор вашлиймаш пайремым эртарышна, эртыше сылне пагытым шарналтен шинчышна. Элеонора Матвеевалан, Раиса Аймурзиналан, Анна Апсатаровалан, Ирина Лекандровалан да нунын пелашыштлан кугу поро таумутым каласыме шуэш. Нунын деч посна тиде вашлиймаш ок лий ыле. Пиалан илышым, кужу ӱмырым тыланена, тек кажне кече у куаным веле конда. Вашлиймашна пеш чот келшыш». (Анисия Шамратова, Янаул район.)

«Вашлиймаш гыч шулдыраҥын пӧртыльым. Чыла туныктышымат порын шарнен илем. Нуно профессийлан гына туныктен огытыл, ончыкылык илышлан путевкым пуэныт. Чылаштлан кугу тау, нуно мыланна ӱшаненыт да шкештат пример лийыныт. Однокурсникем-влак дене кугешнем, ме икте-весынам огына мондо, чӱчкыдын вашлийына». (Люба Ахметшина, Краснокам район.)

Рвезе-влак кокла гыч Виталий Апликаев тыгерак возен. «Мый кажне вашлиймашке мияш тыршем. Тиде гана налме сай эмоциональный зарядат кужу жаплан сита манын шонем. Ий-влак эртат, садлан тыгай вашлиймаш-влакыш кошташ кӱлеш. Икте-весым ужын, ойласен шинчымаш илаш вийым пуа. Чылалан кугу тау!»

45 ий гыч вашлиймаш мемнам угыч тунамсе самырык пагытыш мондыдымашын пӧртылтыш. Но вашлиймашнам мучашлаш жап шуо. Кузе ӧндалалт вашлийна, тугак ӧндалалт чеверласышна. Ончыкыжо Благовещенск олаште чумыргаш каҥашышна.

Пагалыме лудшына-влак, ВК ден Одноклассники соцлаштыклаште вераҥдыме уверым каҥашаш ушнаш ӱжына!