+17 °С
Облачно
Саман увер
1 Августа , 07:42
Мӧр гыч пастила
«Тамле» рубрикыште таче Нефтекамск ола гыч Ю. Фархетдинова лудшо-влакым икымше гана кугымӧр гыч пастилам ямдылыме опытшо дене палдара. «Мый тыгай пастилам шукертак ыштен ончаш шоненам. Пӱртӱс пуымо поянлык гыч, нимом утым ешарыде, ала-мом оҥайым ямдылымем шуын. Адакшым кызыт тӱрлӧ емыж шумо тургым. Теат ыштен ончыза!» - ойла тудо. Кӱлеш: 1 кг кугымӧр, 100-150 г сакыр (але шагалрак; мӧр шкежат путырак шере гын, сакырым кучылтдеак лиеш).
Ю. Фархетдинован фотожо-влак.
Мӧрым сайын мушса, ужар лышташыже деч эрыктыза да кагаз шовычыш кошкаш пыштыза. Емыжым пюре гай лиймеш блендереш тыгыдемдыза. Эше шымаракым ыштынеда гын, тыгыде тушыжым кораҥдашлан тиде немырым шокте гоч колтыза. Сакырым ешарыза да чыла сайын пудыратыза.
Емыжым кошташ верым ямдылыза. Мый духовкеш коштышым. Тыште кӱэшташ кучылтмо пергамент дене пайдаланаш йӧнан. Немырым ямдылыме «лаштыкыш» вичкыжын (3-5 миллиметр кӱжгыт) шарыза. Лончо мыняре вичкыж, пастила тунаре писынрак кошка. Духовкын омсажым изинрак почын, 40-50 градус марте ырыктыме духовкеш коштыза. Мыйын кум шагат эртыш.
Пастилан ямде улмыжым тыге палаш лиеш: тудо парняш ок пиж, но тыгодым пеш эластичный улеш. Тодышталтеш гын, шукырак коштенда.
Ямде пастилам лаштык гыч налза, кужун пӱчкедыза да кажныжым рулет гай пӱтырыза. Шып петыралтше контейнерыште аралыза але пергаментыш пӱтыралза: тыге тудо пушкыдо лиеш, тутло пушыжо аралалт кодеш.
