Российын вийже - ешыште!

«ЧОЛМАН» ГАЗЕТЫМ МАX-ЫШТЕ ЛУДЫНА!

Аграрный университетын самырык-влаклан полатыштыже кажне район выставка дене палдарен. Волонтер-влак спецоперацийыште боевой задачым шуктышо сарзына-влаклан тӱрлӧ йӧным муын полшаш тыршат. Нуно тушко гуманитарный полышым поген колтымышт дене палдареныт, мастер-классым ончыктеныт, тыгак психолог-влак консультацийым, тӱрлӧ творческий программым эртареныт, йоча-влакым модыктеныт. Мероприятийым Еш, йӧратымаш да ӱшанле улмо кечылан лӱмленыт, вет передовойышто улшо пӧръеҥ-влаклан йӧратыше еш - тиде пеҥгыде эҥертыш, ӱшанле тыл. 

СВО-што улшо сарзе-влакын ешышт концерт программыште мастарлыкыштым ончыктеныт. Нунын сценыште шкем кучен моштымышт, кӧргӧ чон дене виян улмышт шижалтын. Концертым СВО-што эргыжым йомдарыше ава З. Гатиятуллина почо. Изи гына ӱдырамаш, но аван вийже «Молитва» мурым колышо эргыж дене мутланыме семын ончыктыш, залыште шинчыше чыла еҥын шинчавӱдшым йоктарыш. Шаран район гыч «Ош пеледыш» ансамбльын участникше-влак (салтак-влакын авашт О. Латыпова, И. Саитова, салтакын пелашыже Н. Ибикаева) «Ош луман ош ялем» мурым йоҥгалтарышт, СВО-што вуйжым пыштыше офицерын ачаже В. Саитовын каласкалыме почеламутшо кажнын чонеш келге кышам кодыш. А. Саитов «Шочмо ялем» мурым пӧлеклыш, тудынат эргыже ончыл линийыште улеш. Участник-влаклан чылаштлан дипломым да шергакан пӧлекым кучыктышт.

Патриотизм шӱлышан фестиваль тӱрлӧ калыкым ик кугу еш гай пырля чумырен. Тушко чумыргышо СВО-н сарзыже-влакын авашт, ачашт, пелашышт да икшывышт могай чытыше да виян улыт! Нуным ончет да умылет: Российын чын вийже - ешыште! Кӧ мемнам кызыт осал тушман деч арала, кӧ нигунам мӧҥгыжӧ ок пӧртыл - чылаштымат йӧратыман да шарныман…  

Пагалыме лудшына-влак, ВК ден Одноклассники соцлаштыклаште вераҥдыме уверым каҥашаш ушнаш ӱжына!