Тыштат марий, туштат марий…

«ЧОЛМАН» ГАЗЕТЫМ МАX-ЫШТЕ ЛУДЫНА!

Мый ялыште илем. А ялыште вольык, кайыквусо да пакча деч посна лиеш мо? Кеҥежым эр гыч кас марте шогылтман, вольык ден пакча шуко жапым, ӱнарым налыт, садлан кеҥежым, йӧным муын, иктаж-кушко каналташ миен толаш телымак планым ыштем. Кажне ийын Соль-Илецкыште ик-кок гана каналтен толам. 

А тушто эр гыч кас марте ик ер гыч весыш, тышке-тушко, кошташ верештеш. Ме Соня лӱман ӱдырамаш дене пырля канена. Кечыгутлан чыла шым ерыштыжат лияш тыршена. Имне дене кондыштарыме тарантасышкат, автокарышкат огына шич, эре эркын йолын гына коштына. 

Каныш годым тӱрлӧ оҥай случай-влакат лиедат. Мый шке ужмем-колмем нерген возем: ала газетым лудшо кокла гыч иктаж-кӧ шкенжым шарналта...

Оҥа дене ыштыме тротуар гай корно дене марла мутланен ошкылына. Шеҥгечна ик ӱдырамаш ошкеда - огешат эрте, мемнан почеш кая да кая. 

- Те марий улыда? - йодо кенета ӱдырамаш. 

Соня йолташем мутлан «кӱсеныш ок пуро», мутланаш пеш йӧрата.

- Ме марий улына, Башкирийысе Шаран район гыч толынна. А те кушеч лийыда?

- Мый Марий Эл гыч улам, шаҥгысек тендам колышт ошкылам. Ойлымыда гыч пелыжым гына умылышым - ала марий, ала татар улыда манын шонкалышым.

- Ме татар коклаште илена, садлан тыге мутланена, шукыжо мемнам огыт умыло, - лым лийде каласкала Соня.

Тыге палыме лийна да умбакыже, воштыл-воштыл, пырля мутланен ошкылна.

Шинчалан ерыш миен шуна. Вӱдыштӧ колко гай киена, вуйна гына коеш. Ончем: Соня трук ала-куш йомо. Тыш-туш ончальым - уке, воктенем нигӧмат ом пале. Мӱндырнырак Сонян йӱкшым кольым.

- Тол тышке, тыште чыла палыме-влак! - кычкыра йолташем. 

Лишкырак мийышым гын, ӧрмаш! Янахмат, Шаран, Тумбагуш, Урсай гыч ик кугу тӱшка канаш толын улмаш…  

Вес кечынжат эрдене корно дене марла мутланен ошкылына. Воктеннак тиде ганат марий-влак ошкылыт улмаш. 

- Шольо-шӱжарем-влак, те кушеч улыда? - йодым мый.

- Бирск район Ӱкӱдо гыч улына. Ме тыште чӱчкыдын канена, мыланна келша, - вашештыш ӱдыр. Тидым-тудым ойлыштын, касса марте пырля мийышна да, билетым налын, кажнына шке корнына дене ошкылна. 

Кече шокшо. Шинчалан вӱд гыч лектым да кугу зонт йымак каналташ возым. А Соня эше вӱдыштӧ ракатлана. 

- Акай, акай, мый тыште улам! - трук ик сер гыч весыш кычкырале йолташем. 

Кычкыра да кидшым рӱзкала. Ончем, чынак, тушто ошмаште Уял гыч Сонян Галя акаже ден Люба йолташыже каналтат. Йолташем куанымыж дене ерым «куржынак» лекте.

 Вес кечыжлан Лавыран ерыш мийышна. Киш гай лавырам кап мучко шӱрен шынденнат, шинчана веле коеш. Коло минут чыташ кӱлеш, садлан сер воктене пешат шеме койын шогена. Тиде жапыште мемнан деке кок ӱдырамаш лишемыч да мемнан семынак лавырам йыгаш тӱҥальыч, шкешт марла мутланат. Соня чытен ыш керт, воктекышт мийыш. Тиде ганат палыме лийна. Акаже да шӱжарже Свердловск областьыште илат, отпуск жапыште Соль-Илецкыш каналташ толыныт улмаш. Тидым-тудым ойлыштын, Мишкан район Измар ял гыч улмыштым пален нална.

Вот тыгеат лиеда, йолташ-влак. Марий калык шагалемеш манына. Теве Соль-Илецкыште тыштат марий, туштат марий - ӧрат веле. Мо куандара, марий улмышт деч огыт вожыл, шочмо йылмына дене мутланат. 

Июль тӱҥалын веле, а йолташем телефон дене йыҥгыртенат шуктыш: «Каныш жап тӱҥалын. Соль-Илецкыш каяш ямдылалтат? Адак марий родына-влак дене палыме лийына…»

Пагалыме лудшына-влак, ВК ден Одноклассники соцлаштыклаште вераҥдыме уверым каҥашаш ушнаш ӱжына!