+15 °С
Ясно
Саман увер
24 Июня , 08:01
Эльбрусыш кӱзаш куштылго огыл
Кеҥежым шуко еҥ канен але тӱрлӧ верлам ужын толаш йӧным муаш тырша. Теве июнь тӱҥалтыште Октябрьский ола гыч 37 еҥ автобус тур дене Кавказыш миен. Тӱрлӧ ийготан турист-влак коклаште Шаран села гыч марий предприниматель Н.М. Давлетоват лийын. Надежда Мурзагареевна путешествоватлаш, мотор вер-шӧрлам ужын кошташ йӧрата. Иремель курыкышто, Байкал ер воктен, Грузийыште, Абхазийыште, Алтайыште да моло вереат лийын. Эльбрус курыкын кумшо уровеньыште, 5842 метр кӱкшытыштӧ верланыше кӱкшакашкыже кӱзен кертын. Экскурсий гыч пӧртылмекше, тудын дене Шараныште вашлийын мутланышна.
Эльбрус курыкыш кӱзышӧ-влак. Н.М. Давлетова пурла гыч икымше. Еш архив гыч налме фото.
- Мый тӱням ужын кошташ, пӱртӱс лоҥгаште лияш, моло кундемлаште калык кузе илымым пален налаш моткоч йӧратем. Тазалыкем уло годым чыла шке шинчам дене ужнем да шӱм-чонем дене шижнем, вет шке ужмым нимо дене таҥастараш ок лий. Сандене тений Кабардино-Балкарийысе ик эн кӱкшӧ курыкым - Эльбрусым - ужаш шонен пыштышым. Тушко мийымын амалжак тугай ыле - канатно-кресельный корно дене кумдан чапланыше Эльбрусыш кӱзаш.
Курыкыш кӱзаш куштылго огыл, но, кумыл уло гын, чыла сеҥаш лиеш. Тушто юж яндар, йӱштӧ, шӱлашат кумылло. Кече шыратен онча. Курык ӱмбалне лум кия. Пӱртӱс моткоч сӧралын коеш - ончымо гына шуэш. Кажне туристын тудо йӱштӧ кундемыш уэшын пӧртылмыжӧ шуэш, шӱм-чонышт курык лоҥгаш шупшеш манын шонем, - куанен каласкалыш Надежда Мурзагареевна.
- Корныда кужу, эше кушто лийында да мо оҥайым ужында?
- Эн ончыч Волгоград герой олам, Мамаев курганым ужна, Калмыкийын степьшым эртышна. Экскурсий турын программыже пеш поян ыле. Кумдан палыме Пятигорск, Кисловодск, Ессентуки ола-влакым ужаш - кугу пиал. Кисловодскышто 1803-шо ийысе крепостьым, Никольский храмым, Лермонтовский площадкым ончыктышт. Пятигорскышто Машук курыкыш кӱзышна, Елизаветинский галерейыш, парк-влакыш мийышна. Ессентуки - курорт ола, йырым-йыр пеш мотор, вер-шӧрым тӱзатыме. Тушто мланде йымач эмлыше вӱд шолын лектеш. Ме кок источникыш мийышна, минеральный вӱдым йӱна.
Ик арняш «Золотое кольцо Кавказа» тур писын эртен кайыш. Ужын толмо шуко жаплан поро шарнымашым кодыш.
