+17 °С
Облачно
Саман увер
18 Июня , 04:05
Москва гыч диплом дене пӧртылын
3-5 июньышто рÿдоласе ВДНХ-ште «Защищённый грунт России» XXIII Тӱнямбал специализированный выставке эртен. Тушко Уфа оласе «БашИнком» НВП (научно-внедренческий предприятий)» ООО шке сатужым намиен да диплом дене палемдалтын. А кодшийсе выставкыште фитоспорин ваштареш виш мландыште биопрепаратым кумдан да пайдалын кучылтмо шотышто Шӧртньӧ медальым сеҥен налын. «БашИнком» гуминовый вещества, пайдале микроорганизм-влак (поҥго да бактерий) гыч биопрепаратым ямдыла да энтомофагиым - пайдале да кÿлешан насекомый-влакым - луктеш.
В. Васильева (шолаште) выставкыште землякше-влакым вашлийын. Владимир Шамиев - эмлык шудым погышо предприниматель, Дарина ӱдыржӧ дене выставкын ӱжмӧ унаже лийыныт. Еш архив гыч налме фото.
Мишкан район Тынбай ял ÿдыр Вероника Васильева (ÿдыр фамилийже - Шамиева) тиде сомылым 20 ий годсек шукта. 2005-ше ийыште Башкир аграрный университетыште учёный агроном специальностьым налмеке, «Алексеевский» агропромышленный комплексыште биометод шотышто пакчасаскам ончен куштышылан ышташ тÿҥалын, вара микробиологлан, биолабораторийым вуйлатышылан, кушкылым аралыше агрономлан, вÿдышӧ агрономлан ыштен. Тиде жапыште эре пайдале насекомый-влак дене пашам ыштыме шотышто шкенжым шуарен. Университетыште пырля тунемме йолташыжын ÿжмыж почеш кок ий ончыч «БашИнком» предприятийыш куснен. Кызыт кушкылым аралыме шотышто вÿдышӧ специалист улеш, пайдале насекомый-влак дене пашам ышта, консультацийым да налаш шонышо-влаклан умылтарыме пашам намия.
- Пашам шкаланем чот келша. Ме поро миссийым шуктена. Кажне айдеме химийдыме, экологически ару емыжым кочшаш манын шонем.
Тиде пашам 20 ий йӧратен шуктем, биологический методым шымлем, тÿрлӧ чер да вредитель-влак ваштареш пайдале насекомый-влакым да биопрепаратым, кушкыл-влаклан биоудобренийым кучылтмым пайдалылан шотлем. Тидым калык коклашке шараш да умылтараш кÿлмӧ шонымаш денак выставкылаш ушнем. Мый ару биометод верч шогем да шкемым патриотлан шотлем, - каласкала Вероника Семёновна.
В.С. Васильева (шола гыч икымше) да коллегыже-влак.
- Выставке могай шарнымашым кодыш?
- Тыгай выставке-влак пеш пайдале улыт, эре трендыште лияш полшат. Коллега-влак дене ятыр кÿлешан темым тарватенна, тепличный отрасльыште мо тургыжландарымым, рынкыште мо кÿлешан улмым пален налынна, каҥашенна. Кызытсе саманыште пашаеҥ ситыдымаш шонаш тарата, сандене пашам оптимизироватлаш да у техника-влак дене пойдараш шонат. Энтомофаг шотышто разбрызгивательым темлат. Кузе да мом кучылтын, пестидный нелытым иземдаш да экологически ару продукцийым налаш лийме шотыштат шуко уым пален налынна. Элыштына 2024-ше ий 1 сентябрь гыч «Сатурн» системым пуртымо. Тиде системе почеш организаций могай пестицидым кучылтмыжым нормыж дене ончыктышаш. Кажне гана ик тÿрлӧ фунгицидым, инсектицидым але химийым кучылташ гын, организм препарат-влаклан тунемеш, садлан энтомофаг ден биопрепаратын альтернативный вариантыштым кучылташ темлат. Мемнан «БашИнкомын» лукмо «Микориза» биопрепаратше кугу йодмаш дене пайдалана, белорус коллега-влаклан тудо чотак келшен. Российыште «Микоризан» аналогшо моло уке. Тиде выставкыште кок ий почела медальым да дипломым сеҥен налмынат ушеш кугу шарнымашым кода.
- Специалист семын сад-пакчаште емыжым ончен куштышо озаватылан могай каҥашым пуэн кертыда?
- Тÿрлӧ черым (переноспороз, аскозитоз да моло) сеҥыше гибрид сортым налаш тыршыза. Нӧшмым ӱдымӧ годымак да умбакыжат кажне арнян, варарак кок арнялан ик гана биопрепарат-влакым кучылтса. Киярыш, помидорыш да моло емыжыш 10 литр вӱдеш 5 грамм гуми ден 50 мл фитоспорин пробиом йӧрен шаваш лиеш. Молан фитоспорин пробио? Моло тÿрлыжат уло, но тиде биопрепаратым таче шавен, пакчасаскам тиде кечынак кочкаш лиеш. Тудо пробиотик семын мемнан пищеварительный системым саемда, иммунитетым кугемда.
В.С. Васильева выставкыште.
Шуко еҥын теплицыже икмыняр ий ик верыштак шога, садлан тÿрлӧ чер (вожшо шӱэш да молат) погына. Тугеже мыланна мландышке «Триходермиксым» шаваш кÿлеш. Тудын негызше - триходерма харзианум поҥго, тудо тÿрлӧ тошто шÿкшудым, кодшо вож-влакым шем мландыш савыраш полша. Эше тудын составыштыже хлорофилл уло (Хлорелла ужар водоросольын экстратше). Тудым ӱмбач шыжыкташ гын, кушкыл эре ужарген шогаш тÿҥалеш. «Кормилица Микориза» кукшо да вишкыде лийын кертеш. Тудым кокымшо вож, манаш лиеш. Составыштыже гломус поҥго уло, пакчасаскан вожшо дене ваш ушнен, икте-весылан полшат. Тыгак ик верыштак шочын-кушшо кушкыллан мланде йымач макро- да микроэлемент-влакым кÿзыкташ полша. Тудым шавена гын, вож чот келгыш шарла.
Кече вашталтме, юалге-шокшо, кукшо-ночко игече годым кияр але помидор шагалемаш тÿҥалеш, тыгай годым «АминоХит» полша. Мыйын темлыме ой-каҥашем-влак сад-пакчаштыда, теплицыштыда сай лектышым налаш полшат, поген налме емыжда экологически ару лиеш манын шонем.
- Вероника Семёновна, ой-каҥашым пуымыланда, мутланаш жапым ойырымыланда пеш кугу тау. Выставкыште сай лектышым ончыктымыда дене шокшын саламлем да ончыкыжат кугу сеҥымашыш шуаш тыланем.
ВДНХ воктене.
