Кок фотографий

1972 ий июль мучаш. Благовещенск пристанеш шогалше «Ракета» теплоход гыч Чарлак школым тунем пытарыше кум ӱдыр волыш. Педучилищыш кузе кайышашым йодын, кӱшкыла ошкыльыч. Приёмный комиссийыш документым пуэн, тӱшкагудо деке лупшалтыч.

- Комендант уке. Эрла эрдене толешат, малыме арверым пуа. А таче тиде кроватьыште мален лектын кертыда, - каласыш дежурный ӱдырамаш.

- Концертнам умбакыже шуена, - шоктыш йӱк. Пӧлем покшелне шогышо кужу, ужар чия дене чиялтыме ӱстел ончылно кок ӱдыр, икте-весыштым алмаштен, муро почеш мурым шергылтарат. Изирак капан, кок ӱппунеман, канде шинчан мотор ӱдыржӧ, мурен чарнымеке, мемнан пуста кроватьлашке ӧрмалген ончымынам ужын, шкенжын одеялжым мылам шуялтыш.

- Панцирь ӱмбак шарет, - каласыш, - мый Тоня улам.

- А мый - Марина, ме Арзамат гыч улына, - каласыш кумдарак туп-вачан, шем кудыр ӱпан, шем шинчан тугаяк мотор ӱдыр да одеялжым шуялтыш. Кумшо одеялым эше ик ӱдыр пуыш.

Тыге ме Тоня Павлова да Марина Самниева дене палыме лийна. Мый денем пырля тунемаш пураш мийыше йолташем-влак конкурсым сеҥен ышт керт. Тудо ийын марий пӧлкашке 110 еҥ йодмашым пуэн, а налыныт 30 ӱдыр-рвезым веле. Мемнан потокна пеш виян лийын, садлан эше 4 еҥым «запаслан» налыныт. Тыге ме кумло нылытынат ныл ий гыч тӱҥалтыш классын туныктышыжо диплом дене тунем лекна.

Состав шотышто изиш вашталтыш лие: икымше курс гыч Оля лӱман ӱдыр кайыш, а кумшо курсышто Совет Армий радам гыч служитлен толшо Минильян Мимаев ушныш. Тыге ме 21 ӱдыр да 13 рвезе педучилищым тунем лекна. Тиде Мишкан район гыч Алексеева Елена, Андреева Надежда, Байбулатов Денис, Байрамова Татьяна, Валитова Лидия, Гимаев Роман, Иманова Анна, Кутлуметова Мария, Минилбаев Вячеслав, Павлова Антонина, Саликаев Евгений, Самниева Марина, Шакмаев Вениамин, Ябаева Нина, Яндыганов Герман, Калтаса район гыч Григорьев Георгий, Ипаева Людмила, Калитова Дарья, Матвеева Наталья, Мурзабаев Владимир, Тимирбаева Надежда, Шамыкаев Валерий, Яваева Рита, Балтач район гыч Валиахметова  Маргарита, Илимаева Евдокия, Мимаев Минильян, Хайбуллин Василий, Шаран район гыч Минлибулатова Ольга, Шуматбаева Лидия, Караидель район гыч Аймурзина Тамара, Минилбаев Арсений, Нуриман район гыч Алеев Валентин, Илиш район гыч Васюткина Елена, Дӧртыльӧ район гыч мый, Миляева Анна.

Студент илыш пеш поян. Жапыштыже мӱкш омартала гӱжленна. Тунемме деч посна кӧ спорт дене, кӧ вокально-инструментальный, куштышо ансамбльлаште, литературный кружокышто шкенжым шуарен. Тыгак колхоз пасушто пареҥгым луктынна, сурткайык фабрикыште тӱрлӧ сомылым шуктенна - чылажым ойлен пытарашат ок лий. Каныме еда отрошто але тошто тӱшкагудышто катагандыра йол гыч чоҥештен лекмеш куштенна. Мом ойлаш, чыла лийын.

Мемнам, 15 ияш ньога-шамычым, кумда илыш корнышко лукмаште класс ачана М.М. Мадияров, туныктышо-влак Н.И. Бушкова, В.И. Токтаев, П.А. Абъялиев да молат тыршеныт.

Кажне коллективын шкенжын лидерже-влак улыт. Тунемме жапыштат, тунем лекме деч вара нине витле ий коклаште тыгай рӱдылан мый Тоня Павловам, Марина Самниевам да Нина Ябаевам шотлем. Кӱшнӧ каласыме ӱдыр-шамыч икымше курсыштак пошкудо пачерыште илыше Нина дене келшаш тӱҥалыныт, кызытат ойырлен огыт керт. Шке семынем мый нуным «вашкеполыш» манам. Кӧ пӧртым кутла, кӧн юбилейже, кӧн иктаж-могай ойго але йолташнам пытартыш корныш ужатыман - эн ончыч нуно кидым шуялтат. Кок ий ончыч мыйын кугу ойго лие. Тудым куштылемдаш полшышо Рита Яваевалан, Люда Ипаевалан да Лида Валитовалан кугу таум каласыме шуэш.

Каласаш кӱлеш, йолташна-влакын шкеныштынат илышышт ӱй да мӱй огыл. Кажныжым илыш тӱрлӧ семын лупшен. Нина 2002 ийыште таджико-афганский чекыште кугу эргыжым йомдарен. Изи эргыже-влакым йол ӱмбак шогалташ могай гына пашаште тыршен огыл. Маринан кугу эргыже, шучко черым сеҥен кертде, илыш дене чеверласыш. Тоня, офицерын ватыже, Саша пелашыж дене пырля кушто гына служитлен огытыл, тудын куштылго огыл службыжым пайлен. Марина ӱмыржӧ мучко Арзамат школышто пашам ыштен. Пеш шуко Чап грамотыжо уло. Рита, канаш лекмешкыже, Нефтекамск оласе йочасадыште тыршен, Россий Федераций кӱкшытан наградыжат уло. Кажныж нерген возаш тӱҥалат гын… Йолташна-влак пеш весела кумылан улыт. Марина Мишкан тӱвыра полат пеленсе «Ручейки» ансамбльын уста солисткыже улеш, а Нина Монар клуб пеленсе вокальный ансамбльыш мураш коштеш. «Муро дене ме чыла ойгынам мондена, илышлан куанена», - ойла тудо.

Педучилищым тунем пытарымылан тений витле ий темеш. Тиде жапыште мемнан радам гыч класс ачана М.М. Мадияров, Женя Саликаев, Георгий Григорьев, Лена Васюткина, Минильян Мимаев, Роман Гимаев да Герман Яндыганов илыш дене чеверласен кайышт.

«Вашкеполыш» однокурсник-влакым 24 июньышто Благовещенск педучилище кафе воктеке 12 шагатлан вашлиймашке ӱжеш. Чыланат толыда манын ӱшанен кодам.

«ЧОЛМАН» ГАЗЕТЫМ МАX-ЫШТЕ ЛУДЫНА!