Элым вияҥдыме шонымаш нерген

Илышым кузе сайракым, йӧнанракым, лӱдыкшыдымыракым ышташ? Сай темлымашда уло гын, тидын нерген увертараш да тудым илышыш шыҥдараш йӧн дене пайдаланаш лиеш. Кызыт элыште «Сильные идеи для нового времени» конкурсым эртарат. Тудын тӱҥ шонымашыже: Российын суверенитетшым пеҥгыдемдаш да элым вияҥдаш полшышо инициативым темлаш. Проектда верысе проблемым веле решатлаш полша гынат, тудо уло эллан пайдам конден кертеш. Виян идейым эксперт-влак садак ужыт да тудлан илышыште корным муаш полшат. 

Йодмашым кузе пуаш?

Проектым да темлымашым 15 июнь марте идея.росконгресс.рф платформышто вераҥдаш лиеш. Йодмашым погымо деч вара организатор-влак 100 эн сай инициативым ойырат. Нунылан регион, партнер, инвестор-влак полышым пуат, а автор-влаклан профессионально да мер илышыште кушкаш йӧн лиеш. Эн виян инициатива-влак дене 22-23 июньышто иктешлыме мероприятийыште Президентымат палдарат. «Таче тӱняште тӱҥ конкуренций технологий ден ресурс верч веле огыл, эше жап верч: у йӧн-влакым писын гына муын да илышыш шыҥдарен, еҥ-влакын вийыштым почын моштыман», - ойла РФ Президентын администрацийжым вуйлатышын алмаштышыже, «Сильные идеи для нового времени» форумын оргкомитетшым вуйлатыше Максим Орешкин. 

Могай идейым вучат?

Темлымашым вич направлений дене налыт.

Национальный социальный инициатива. Мутлан: Еш-влаклан кузе полшаш? Еҥ-влакым кузе таза илыш-йӱлалан кумылаҥдаш? СВО-н ветеранже-влаклан да нунын ешыштлан могай полышым пуаш? Здравоохраненийыш, образованийыш, калыкым социально аралыме сомылыш цифровой платформа ден искусственный интеллектым кузе шыҥдараш? Изи ола-влакым кузе вияҥдаш? 

Национальный кадровый инициатива. Мутлан: Эрла кӱлешан специалист лияшлан таче могай моштымашым вияҥдыман? 50 ий деч кугурак ийготан-влаклан кузе у карьерым ышташ? Паша рынокым мом вучымым кузе ончылгоч рашемдаш? Изи олалаште да яллаште кузе у паша верым ышташ да талантан самырык-влакым тиде сомылыш ушаш?     

Национальный технологический инициатива. Мутлан: Ончыкылыкын технологийже-влакым кузе ышташ? Искусственный интеллектым тӱрлӧ отрасльыш кузе чолганрак шыҥдараш? Автономный да интеллектуальный технологий-влак негызеш ола-влакым кузе вуйлаташ?   

Экологий да климат дене кылдалтше корно. Мутлан: Кузе пӱртӱсым арален кодаш? У климатический условийлан кузе йӧнештаралташ? Кузе илышлан йӧнан вер-шӧрым ышташ?   

Национальный предпринимательский инициатива. Мутлан: Инвестор-влакым кузе муаш, кузе нуным тӱвыра наследийым арален кодымо проект-влакыш ушаш? Креативный экономикылан да национальный бренд-влаклан инфраструктым кузе ышташ?