+18 °С
Облачно
Саман увер
29 Мая , 09:31
Шарнымаш стелым почыныт
Теҥгече Пограничникын кечыжым эл мучко палемдышт. А Пÿнчерыште кугыжаныш чекым аралыше-влаклан стелым почыч. Тидын дене ончыкылык тукымлан историйым шарнен илаш, пограничник-влакын суапле пашаштым аклаш манын негызым ыштыме.
Авторын фотожо-влак.
Мероприятий шуко еҥым чумырен: тиде район кӧргысӧ ялла гыч пограничный войскан ветеранышт, ял калык, ÿжмӧ уна-влак да молат. Брест крепостьым аралымаште лийше Кугу Соказа ялын эргыже И.И. Ибутаев (1919 ийыште шочын.) нерген уныкаже Г.И. Васильева каласкалыш. Пограничник-влаклан мемориалым чоҥен шогалтымаште Владимир Кутлубаевын надырже кугу. Тудак проектын авторжо улеш, шке йырже ÿшанле командым чумырен кертын. Вийым да жапым чаманыде, ялысе уста кидан пограничник-влак шкеак площадкым ямдыленыт да стелым чоҥен шогалтеныт. «Тиде верым герой-влакын аллейышт семын сӧрастараш шонена, - каласыш ялсовет вуйлатыше С.Г. Сергеев. - 1 июльышто локальный сар-влакын сарзыштлан стелым почаш шонена».
Район да ял поселений администраций-влакын инициативный тӱшкашкышт пурышо, пашаште ойыртемалтше чолга еҥ ден тале пограничник-влакым тауштымо серыш, Чап грамота дене палемдышт. Шийвундо дене полшышо ял калыклан, спонсор-влаклан кугу таум ойлышт. Пограничник-влакын службыштым кÿкшын аклен, пайрем кечын нуным шокшын саламлышт. Тÿрлӧ жапыште тыныс илышым аралыше, эрык верч илышыштым пуышо пограничник-влакым пагален да шарнен илымым ончыктен, стела воктеке пеледышым пыштышт, ик минут шып шоген шарналтышт. Тидыже Шочмо элна дене кугешныме кумылым эшеат вияҥда, Россий мландынам, Пошкырт кундемнам йӧраташ, пагалаш да тыныс илышым аралаш ÿжеш.
