Искусственный интеллектым илышыш шыҥдарат

Башкирий - илышын тӱрлӧ сферышкыже искусственный интеллектым эн ончыч шыҥдараш тӱҥалше регион-влак гыч иктыже. Республика Вуйлык Радий Хабировын мутшо почеш, еҥ-влакын илышышкышт у технологий-влакым шыҥдараш кугыжаныш йӧным ыштышаш. «Искусственный интеллект ончыкылык технологий лиймым чарнен. Тачысе кечылан тиде, регион-влак таҥасен кертышт манын, кӱлешан ӱзгар. Але ме таче тидлан тунемына да ончык лектына, але шеҥгелан кодына», - каласен Радий Хабиров.

Мо тыгай ИИ, кушто ме тудым кучылтына?

Шуко еҥ тымарсекат раш огеш пале - мо тугай искусственный интеллект? Робот? Компьютер? Программа?

Искусственный интеллект - тиде машина-влакын айдеме интеллектым йодшо задачым шуктен кертмышт. Илышыште ме тудден шукертсек пайдаланена: телефонысо приложений гыч эрла игече могай лийшашым, корнылаште машина шуко улмым да молымат пален налына.

Искусственный интеллект моткоч неле задача-влакымат решатлен кертеш. Мутлан, медициныште снимке-влакым акла, айдемын уждымо вашталтышым «ужын шукта» да вашмутым пуа. Промышленностьышто машина-влакын пашаштышт изи экшыкымат шижтара, нефтяник-влак тудын полшымыж дене мыняр нефтьым лукшашым пален налыт. 

Тыгай примерым ятыр кондаш лиеш. Искусственный интеллект - пеш сай полышкалыше. Тудо специалист-влаклан жапым аныклаш, пашан качествыжым саемдаш йӧным пуа. 

ИИ шотышто совет молан кӱлеш?

Башкирийыште искусственный интеллектын технологийже-влакым эше талынрак шыҥдараш да тудын йӧнжӧ-влак нерген чӱчкыдынрак каласкалаш шонат.

«Еҥ-влак у технологий-влак деч лӱдшаш огытыл, нунын могай улмыштым да кузе кучылтмым умылыман», - палемден Радий Хабиров.

Технологийым келгынрак шыҥдараш манын, Радий Хабиров Цифровой вияҥмаш шотышто ведомство-влак кокласе советым ыштен. Ты пашам виктарен колташ Башкирий Правительствыште Премьер-министрын алмаштышыже должностьым пуртеныт - тушто Олег Ли пашам ышташ тӱҥалеш. Ончыч тудо Россий Правительство пеленсе Искусственный интеллектым вияҥдыме национальный рӱдер вуйлатышын советникше лийын.  

 Шке пример дене

Искусственный интеллектым шыҥдарыме сомылым власть шкеж деч тӱҥалеш. Республика вуйлатыше министерство ден ведомство-влаклан ИИ-м шыҥдарыме направлений-влакым рашемдаш да шкеныштын цифровой трансформаций программыштым ямдылаш, калыклан искусственный интеллектын пайдажым умыландарыме пашам тарваташ шӱден.