Радий Хабиров - Нефтекамскыште

Нефтекамскын социально-экономически вияҥме йодышлажым Башкортостанын Вуйлыкшо Радий Хабировын эртарыме совещанийыште каҥашеныт. Тудын пашашкыже республика Правительствын еҥже, министерство да ведомство вуйлык, верысе администраций пашаеҥ-влак ушненыт.

Совещанийым почшыжла, Башкортостанын Вуйлыкшо муниципалитетын республикын экономикышкыже кугу надырым пыштымыжым палемден. «Куштылго огыл условийым ончыде, ме илышнан чыла сферыжым икшырымын вияҥдаш йӧным ыштена. 2026-шо ийысе январь-март тылзылаште производствын объемжо республикыште ныл процент наре, а Нефтекамскыште 12 процент наре кушкын. Тыште инвестицийым ушымо шотыштат удан огыл тыршат. «Нефтекамск» ТОР 2,5 млрд теҥгеаш проектым илышыш шыҥдара.

Эше ик кӱлешан направлений - инфраструктурный да социальный объект-влакым чоҥымаш. 

Олаште федеральный полыш кӱшеш вӱдым ситарыме да йоктарен колтымо сетьым уэмдат. Нефтекамск кугыжаныш филармонийым ачалаш тӱҥалме.

У тунемме идалыклан Нефтекамск машиностроительный колледжым уэмден шуктынешт. Тудо Россий Просвещений министерствын конкурсыштыжо сеҥен - колледжыште «НЕФАЗ» публичный акционер ушем дене пырля кызытсе жаплан келшыше образовательный кластерым ыштат. А 14-ше микрорайонышто «Самырык да икшыве-влак» нацпроект почеш 1,2 тӱжем веран кугу школым чоҥат», - каласен Радий Хабиров.

Республика вуйлатыше муниципалитет вуйлык-влакын олаште йӧнан среда верч тыршымыштлан таум каласен. 2019 гыч 2025 ий марте федеральный проект почеш Нефтекамскыште 38 объектым тӱзатыме.

Радий Хабиров оласе индустриальный флагманын - Нефтекамск автозаводын пашажлан поснак кугу тӱткышым ойырен. «Пытартыш вич ий предприятий сайын вияҥеш, ты ийлаште 161 млрд теҥгеаш продукцийым колтен. Тылзаш кокла пашадар кушкын, налогымат шукырак тӱлат. Тыгодымак, производство комплекс икшырымын пашам ыштыже манын, южо йодышым решатлыман. Республика палемдыме планым илышыш шыҥдараш полшаш ямде», - манын республика вуйлатыше.

2025-ше ий ноябрьыште Нефтекамскыште Башкортостан Правительствын выездной заседанийже эртен, тушто олам вияҥдыме «корно картым» пеҥгыдемденыт. Совещанийыш чумыргышо-влак тиде документыште палемдыме паша-влакым кузе шуктымым, экономика да социальный сферысе отрасль-влакын пашашт дене кылдалтше йодышлам каҥашеныт.

«Чумыр ончымаште Нефтекамск - йол ӱмбалне пеҥгыдын шогышо, сайын тӱзатыме ола, тыште пашам тыршен ыштыше еҥ-влак илат», - иктешлен Башкортостанын Вуйлыкшо Радий Хабиров.