Уфа гыч кушко канаш каяш лиеш?

Кеҥеж - канаш, вий-куатым погаш, идалык мучкылан сай шарнымашым ситараш эн келшыше жап. А ме таче тыланда Уфа гыч виклан кушко комфорт дене каяш лийме нерген каласкалынена.  

Ынде Абхазий эше лишылрак

Сухум, Гагра, Пицунда ола-влакын лӱмыштым колмек, вигак теҥызыште вӱд толкыналтмым, пальма-влакын юж дене лӱҥгымыштым шижмыла чучеш. Абхазийысе курорт-влак мыланна шукертак пеш лишыл улыт. Тымарте тушко миен шуаш йӧндымырак ыле: ончыч Сочиш каяш, вара эл-влакын чекыштышт икмыняр шагат дене автомобиль пробкышто шогаш кӱлын. А ынде кум шагат гыч теҥыз воктенат лийыда!

6 майыште Уфа гыч Сухумыш икымше авиарейсым колтеныт. Кужун вучымо пассажир-влакым эсогыл калык муро да куштымаш дене вашлийыныт, вет нине республикыла коклаште 30 ий вияш кыл лийын огыл. Российыш тыгай рейсым почаш манын, Абхазийысе авиагаваньыште кугу реконструкцийым ыштеныт: терминалым чоҥеныт, самолет чоҥештен кӱзымӧ да шичме полосам, диспетчер оборудованийым тичмашнек уэмденыт.

Сухумыш пассажир-влакым 50 веран Bombardier CRJ100/200 юж судно дене «РусЛайн» авиакомпаний шупшыкта. Самолет изарнян Уфа гыч кая да вӱргечын Абхазий гыч чоҥештен толеш. 

Южышто 3 шагатат 25 минут лиеш, билет акше 10 тӱжем теҥге гыч тӱҥалеш. Ты программым октябрь покшелне мучашлаш шонат.

Республикыштат канаш лиеш

Такшым ме шкежат элнан ик эн мотор кундемыштыже илена. Тыште курык-влакыш походыш кошташ, эҥерлаште пуш дене ийын волаш, верысе калыкын кочкыш-йӱышыжым кочкын ончаш лиеш - йот элласе турист-влак Башкирийыш лач тидлан верчынак коштыт. Мыланнат жапым арам йомдарыман огыл, вет ятыр вереже шке автомобиль дене гына огыл, моло семынат миен шуаш лиеш. Мутлан, Белорецк районын сӧрал вер-шӧржым ончалнеда гын, электричка дене корныш тарванен кертыда. Тиде кечылаште Уфа гыч Белорецкыш кок системан «Финистым» колтеныт. Кӱртньыгорно пашаеҥ-влакын мутышт гыч, тудо переменный да постоянный ток дене пашам ыштен кертеш да пеш чот жапым аныклаш полша. Ончыч Инзер станцийыште ток вашталтмылан кӧра локомотивым алмашташ кӱлын гын, ынде тидым ыштыман огыл. Ончычсо семын куд шагатыште огыл, вич шагатыште миен шуыда, варарак тиде жапым ныл шагат марте кӱчыкемдынешт.

Самара шотышто кузерак?

Самара - Юл серыште верланыше мотор ола. Тудо сӧрал пейзажше, ожнысо архитектурыжо-влак да поян историйже дене оҥай. А колжо могай тамле! Эше тышке Уфа гыч писе электричка кошташ тӱҥалын.

Ончыч, Самарыш миен шуаш манын, кандаш шагат утла поезд дене каяш кӱлын. Кызыт пассажир-влакым «Ласточка» шупшыкта, куд шагатат пеле веле кайыман. БР Транспорт да корно озанлык министерствын палемдымыж почеш, тора верлаш кудалыштше поезд-влак дене таҥастарымаште, тыште региональный да федеральный льгот-влак улыт. Тичмаш билет ак 1599 теҥге шога, а тунемше ден студент-влак 871 теҥгем гына тӱлат.

Уфа гыч Самарыш пригородный поезд-влак шуматкечын да рушарнян, а Самара гыч Уфаш кугарнян, шуматкечын да рушарнян коштыт. Корнышто индеш вере шогалыт.

Каласыман, тиде Башкирийым пошкудо регионла дене ушышо икымше  кӱртньыгорно проект огыл. 2021-ше ий гыч Уфа гыч Оренбургыш да мӧҥгешла кажне кечын «Южный экспресс» коштеш. Пассажир-влаклан йӧнан лийже манын, тений 1 май гыч каныш да пайрем кечылаште Оренбург - Кумертау - Уфа маршрут дене кокымшо мужыр писе пригородный поездым колтеныт. Тыгак электричка дене Уфа гыч Челябинскышкат каяш лиеш.

Уфасе аэропорт гыч самолет-влак эше кушко чоҥештылыт?

Абхазий деч посна республикыште илыше-влак Уфа гыч Батумиш, Ереваныш, Шарджуш, Саньюш, Нячангыш вияш рейс дене чоҥештен кертыт. Антальыш да Стамбулыш рейсым ешареныт. Таджикистаныш Российысе авиакомпаний-влак дене пырля тений гыч шкеныштын Somon Air компанийыштат шупшыкта. Башкирийыште илыше-влак Ташкентыш да Самаркандыш уло кумылын коштыт.

Вашке гыч «Уфа» аэропорт гыч вияш рейс дене Казахстанысе Актау курортышкат чоҥешташ лиеш. Тиде направлений дене чоҥештылме программым 24 май гыч SCAT авиакомпаний да кугу туроператор-влак пырля илышыш шыҥдарат (авиабилетын акше шукыж годым турын акышкыже пурталтеш). Ты рейс дене рушарня еда Boeing-737-700 чоҥештылаш тӱҥалеш. Актауш 2 шагатат 5 минутышто миен шуэш.

Эл кӧргысӧ авиалиний-влакымат вияҥден толыт. Уфа гыч тыгак Геленджик, Минеральные Воды, Махачкала, Калининград олалаш, а 29 май гыч эше Владикавказышкат чоҥештылаш лиеш. Тушко кугарня еда NordStar компанийын Boeing 737-800 самолетшо-влак каяш тӱҥалыт. Ик велыш чоҥешташ 8 тӱжем теҥге деч шагал огыл тӱлаш верештеш.

Радий Хабиров, Башкортостан Республикын вуйлыкшо:

 - Мемнан республикыште илыше-влакын путешествоватлаш кумылышт уло, а ме нунылан йӧным ыштышаш улына. Ончыкыжо эше Минскыш ешартыш авиарейсым почнена, Белоруссий дене уже кутырен келшыме.