Пел курым утла ешын шокшыжым саклат

Таче мотор Чикей ялыште илыше шуко икшыван Мрясевмыт еш нерген каласкалынем. Анатолий Адылович тыштак кушкын. У Пайгелде ялын Минлиян ӱдыржӧ дене изи годсек палыме лийыныт, коктынат Папановка школышто кыдалаш шинчымашым налыныт. 

Ешым чумырышо мужыр ынде теве 57 ий пырля ила. Анатолий Бакале СПТУ-што шофер-трактористлан тунем лектын. Шочмо эл ончылно порысшым Грузийыште шуктен, 3 ий противовоздушный войскаште служитлен.  

Пашам йӧратыше вате-марий ӱмырышт мучко Чикейыште илат. Анатолий Адылович «Мичуринский» совхозын Чикей отделенийыштыже ончыч шоферлан, а вара ДТ-75 гусеничный трактор дене пашам ыштен. Мыняр гектар пасум куралмыжым, тырмалымыжым да ӱдымыжым шотленат пытараш огеш лий. Тыге тудо, пенсийыш лекмеш, верысе озанлыкыште тыршен. «Паша кече эр ӱжара дене тӱҥалын да кас йӱд марте шуйнен. Неле лийын, корнышто машина, пасушто трактор ик гана веле огыл пудыргеныт, но чыла чыталтын, пашам кугу кумыл дене ыштенна. Вет мемнан тукым киндын акшым пала. Тунам паша верыште дисциплина да порядке эн ончылно лийыныт», - эртышым шарнен ойла Анатолий Адылович.

Минлиян Ахметовна 9 ий Чикей клубым вуйлатен. Тунам библиотекат клубыштак верланен, библиотекарь сомылымат шукташ логалын. Ялыште самырык-влак шуко лийыныт, кастене, клубыш погынен, гармонь почеш муреныт-куштеныт. Самырык ешыште икшыве-влак шочмек, кастене клубыш кошташ нелырак лийын, садлан Минлиян Ахметовналан паша верым вашталташ верештын. Пенсий марте Росгосстрахыште страховой агентлан ыштен. 

Мрясевмыт ӱмырышт мучко тыршен пашам ыштеныт. Нунын пашаштым Чап грамот, таумутан серыш, окса премий да шергакан пӧлек-влак дене палемденыт. Коктынат паша ветеран улыт. 

Анатолий Адылович ял старостан сомылжымат шуктен. Калык дене пырля ялым тӱзатеныт, субботник-влакым, пайремым эртареныт. Еҥ-влак деч оксам поген, Кугу Ачамланде сарыште вуйыштым пыштыше землякышт-влаклан мемориалым шогалтымаштат чот тыршен. 

Вате-марий ялыште пагалыме еҥ улыт. Нунын кожмак койышышт сурт сомыл дене гына шогылташ огеш пу. Минлиян Ахметовна крючок дене пӱкен леведыш ден салфетка-влакым, уныка-влаклан пижым, носким пидеш.  «Башкирское долголетие» программа дене пайдаланен, республикынан тӱрлӧ вержым ужын кошташат йӧным муыт.

Анатолий ден Минлиян куд икшывылан илышым пӧлекленыт. Шуко икшыван авам 1-ше да 2-шо степенян «Медаль материнства» дене наградитленыт. Кызыт йоча-влак кушкыныт, шке илыш корныштым, йӧратыме профессийым ойырен налыныт, тӱрлӧ вере илат. Ачашт-авашт нуным пашам йӧраташ, чолга да поро лияш туныктеныт.

Анатолий Адылович ден Минлиян Ахметовна эн изи Альберт эргышт да Кристина шешкышт дене пырля илат. Шке вий дене чоҥымо кугу пӧртыштӧ чылалан вер сита. Кеҥежым, чылан толыт гын, кугу ешыште 35 еҥ погына. 

Кеч-могай мужырлан пашам пырля ворандараш куштылгырак. Кугу еш шуко вольыкым ашна. 12 гектар мландыште шурным, шудым ӱдат. Пашалан шкеныштын техникышт уло. «Беларусь» трактор, грузовой машина, шке пилорамышт - чылажат озанлыклан пеш кӱлешан.

Ешышт чӱчкыдын иквереш погынымо, кугезе йӱлам шуктымо, ваш-ваш умылымо, пашам йӧратыме да унам вашлийын моштымо дене ойыртемалтеш. Нуно таза илыш-йӱлам кучат, пошкудо-влаклан эреак полшаш ямде улыт. Мужыраҥмыштлан 57 ий эртен гынат, икте-весыштым кызытат йӧратат да пагалат. Эрге-шешке, ӱдыр-веҥе-влаклан, 16 уныкалан да эше кум кугезе уныкаштлан куанен илат, нуным самырык мужыр-влаклан пример олмеш ужман.