Ешем дене кугешнем

Ме Башкортостан Республикыште верланыше изи ялыште илена. Янахмат ял моторлыкшо да тымык уремлаж дене ойыртемалтеш.

Кажне ешын негызшылан ава-ача шотлалтыт. Нуно йочаштлан вияҥаш полшат. Авам ден ачам - Мария ден Валентин - коктынат кумло шым ияш улыт, коло ий утла икте-весыштым пагален, йӧратен, ваш-ваш умылен илат.

Авам чыланнан верч азаплана. Тудо кажне йочажлан кугу тӱткылыкым ойыра. Авамын уш-акылже да чытышыже нелылыкым сеҥаш, илышыште вашлиялтше тӱрлӧ проблемым решатлаш полшат. Тудо эше уста кулинар улеш. Кажне шуматкечын мемнам куандараш тутло тортым кӱэштеш. Тыгай тамле кочкыш ешым ик ӱстел йыр чумыра.

Ачам яра жапыште колым эҥыраш да сонарыш кошташ кумылан. Тудын шкенжын мӧрым ончен куштымо бизнесше уло. Тиде сомыл тудлан парышым веле огыл, тугак куаным конда - пӱртӱс дене «мутланаш» да пайдале пашам шукташ йӧным пуа.

Эн кугу изам - латкуд ияш Алан. Изам индешымше класс деч вара Москваш шинчымашым погаш кайыш. Шочмо верже деч тораште улеш гынат, мемнан дене пеҥгыде кылым куча. Кокымшо изам - латвич ияш Илья. Верысе школнан индешымше классыштыже тунемеш. Илья колым кучаш йӧрата, пӱртӱс лоҥгаште шуко жапым эртара.

Мый Кира улам. Мылам латныл ий, кандашымше классыште тунемам, книгам лудаш йӧратем, спорт дене кылым кучем. Эше авам-ачамлан озанлыкыште полшаш тыршем, нуным моткоч йӧратем. Ешыштына эн изи - ныл ияш Амелия шӱжарем. Тудо йочасадыш коштеш. Шӱжарем сӱретлаш, мураш да модаш йӧрата. Шыргыжалмыже кеч- кӧнат кумылжым нӧлталеш.

Ешна марий калыкын йӱлажым шуктен да жаплен ила. Калыкнан могай гына пайремже лиеш гынат, эре ушнена. У ийым эн чот вучена. Пырля кожым сӧрастарена да пайремым родо-шочшо коклаште эртарена, икте-весылан пӧлекым ямдылена. А  кеҥежым еш дене пырля канаш коштына, жапым веселан эртарена.

Мый ешем дене кугешнем да лишыл еҥем-влаклан тауштем. Нуно мылам чыла шотыштат полшат, ончыко каяш да шонымашыш шуаш кумылаҥдат. Ешем - мыйын эҥертышем, суртем да пиалем.